ପ୍ରଧାନମନ୍ତ୍ରୀ ମୋଦୀଙ୍କ ନାଁରେ ମାଛ ମାର୍କେଟ: ସୁରଟରେ ଆରମ୍ଭ ହେଲା ବିବାଦ, ବୋର୍ଡ ହଟାଇବାକୁ ଦାବି
ସୁରଟ: ଗୁଜରାଟର ସୁରଟରେ ନୂଆ କରି ନିର୍ମାଣ ହୋଇଥିବା ଏକ ହୋଲସେଲ ମାଛ ମାର୍କେଟର ନାମକରଣକୁ ନେଇ ଏବେ ନୂଆ ବିବାଦ ସୃଷ୍ଟି ହୋଇଛି। ସୁରଟ ନାନପୁରା ଅଞ୍ଚଳର ଲକଡକୋଟଠାରେ ନିର୍ମିତ ଏହି ମାର୍କେଟ ଗେଟ୍ରେ ‘ଶ୍ରୀ ନରେନ୍ଦ୍ର ମୋଦୀ ହୋଲସେଲ ଫିସ୍ ମାର୍କେଟ’ ଲେଖାଥିବା ଏକ ବଡ଼ ବୋର୍ଡ ଲଗାଯିବା ପରେ ଏହାକୁ କିଛି ବ୍ୟବସାୟୀ କଡ଼ା ବିରୋଧ କରିଛନ୍ତି।
ଶାକାହାରୀ ମୋଦୀଙ୍କ ନାଁକୁ ନେଇ କାହିଁକି ବିରୋଧ?
ବ୍ୟବସାୟୀଙ୍କ ଅଭିଯୋଗ ଅନୁଯାୟୀ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜଣେ ସମ୍ପୂର୍ଣ୍ଣ ସାକାହାରୀ ବ୍ୟକ୍ତି। ସେ କେବେ ବି ମାଛ କିମ୍ବା ସାମୁଦ୍ରିକ ଖାଦ୍ୟ ଖାଆନ୍ତି ନାହିଁ। ସୁରେନ୍ଦ୍ର ଲସ୍କରୀ ନାମକ ଜଣେ ବ୍ୟବସାୟୀ କହିଛନ୍ତି ଯେ, ଜଣେ ସାକାହାରୀ ପ୍ରଧାନମନ୍ତ୍ରୀଙ୍କ ନାମକୁ ମାଛ ମାର୍କେଟ ସହ ଯୋଡ଼ିବା ଆଦୌ ଉଚିତ ନୁହେଁ।
ସଂଘର ସଫେଇ ଓ ସରକାରୀ ଅନୁଦାନ:
ଅନ୍ୟପଟେ ‘ସୁରଟ ଫିସ୍ ମର୍ଚାଣ୍ଟ ଆସୋସିଏସନ୍’ (SFMA) ଏହି ନାମକରଣକୁ ସମର୍ଥନ କରିଛି। ସଂଘର ସଭାପତି କଳ୍ପେଶ ନବସାରୀୱାଲା କହିଛନ୍ତି ଯେ, କେନ୍ଦ୍ର ସରକାରଙ୍କ ‘ପ୍ରଧାନମନ୍ତ୍ରୀ ମତ୍ସ୍ୟ ସମ୍ପଦ ଯୋଜନା’ ଅଧୀନରେ ଏହି ମାର୍କେଟ ପାଇଁ ୩ କୋଟି ଟଙ୍କାର ସହାୟତା ମିଳିଛି। ମାଛ ବ୍ୟବସାୟୀ ଓ ମତ୍ସ୍ୟଜୀବୀଙ୍କ ବିକାଶ ପାଇଁ ମୋଦୀ ସରକାର ଅନେକ କାମ କରିଥିବାରୁ କୃତଜ୍ଞତା ସ୍ୱରୂପ ଏହି ନାଁ ଦିଆଯାଇଥିଲା।
ପ୍ରଶାସନର ସ୍ପଷ୍ଟୀକରଣ:
ସୁରଟ ମ୍ୟୁନିସିପାଲ କୋର୍ପୋରେସନ୍ (SMC) ପକ୍ଷରୁ କୁହାଯାଇଛି ଯେ, ନାମକରଣ ନେଇ ଏପର୍ଯ୍ୟନ୍ତ କୌଣସି ଅଫିସିଆଲ୍ ନିଷ୍ପତ୍ତି କିମ୍ବା ପ୍ରସ୍ତାବ ଗୃହୀତ ହୋଇନାହିଁ। ବିନା ଅନୁମତିରେ ଏହି ବୋର୍ଡ ଲଗାଯାଇଥିବାରୁ ଏହାକୁ ତୁରନ୍ତ ହଟାଇ ଦିଆଯିବ ବୋଲି ପ୍ରଶାସନ ସୂଚନା ଦେଇଛି।
ସୂଚନାଯୋଗ୍ୟ, ପ୍ରାୟ ୯ ରୁ ୧୦ କୋଟି ଟଙ୍କା ବ୍ୟୟରେ ନିର୍ମିତ ଏହି ଆଧୁନିକ ମାଛ ମାର୍କେଟରେ ୮୦ଟି ବଡ଼ ହୋଲସେଲ ଷ୍ଟଲ୍ ରହିଛି।
