ଅମିତ ଶାହଙ୍କ ସହ ଘନିଷ୍ଠତା ଯୋଗୁଁ ଜ୍ଞାନେଶ କୁମାର ହେଲେ CEC: ପୂର୍ବତନ ସିଇସି ଏସ.ୱାଇ. କୁରୈଶୀ
ନୂଆଦିଲ୍ଲୀ: ମୁଖ୍ୟ ନିର୍ବାଚନ ଆୟୁକ୍ତ (CEC) ଜ୍ଞାନେଶ କୁମାରଙ୍କ ନିଯୁକ୍ତିକୁ ନେଇ ଦେଶରେ ପୁଣି ଥରେ ରାଜନୈତିକ ସରଗରମ ବୃଦ୍ଧି ପାଇଛି। ପୂର୍ବତନ ମୁଖ୍ୟ ନିର୍ବାଚନ ଆୟୁକ୍ତ ଏସ.ୱାଇ. କୁରୈଶୀ (S.Y. Quraishi) ଏକ ଗୁରୁତ୍ୱପୂର୍ଣ୍ଣ ବୟାନ ଦେଇ କହିଛନ୍ତି ଯେ, ଜ୍ଞାନେଶ କୁମାର ନିଜର ଦକ୍ଷତା ନୁହେଁ, ବରଂ ଗୃହମନ୍ତ୍ରୀ ଅମିତ ଶାହଙ୍କ ସହ ଘନିଷ୍ଠ ସମ୍ପର୍କ ଯୋଗୁଁ ଏହି ସର୍ବୋଚ୍ଚ ପଦବୀରେ ପହଞ୍ଚିଛନ୍ତି।
କୁରୈଶୀଙ୍କ ଅଭିଯୋଗ ଅନୁଯାୟୀ, ପ୍ରଶାସନିକ ସ୍ତରର ନିୟମିତ ଚୟନ ପ୍ରକ୍ରିୟା (Empanelment) ବେଳେ ଜ୍ଞାନେଶ କୁମାରଙ୍କୁ ଅତିରିକ୍ତ ସଚିବ କିମ୍ବା ସଚିବ ପଦବୀ ପାଇଁ ମଧ୍ୟ ଯୋଗ୍ୟ ମନେକରାଯାଇ ନଥିଲା। ହେଲେ ଅମିତ ଶାହଙ୍କ ନିକଟତର ହୋଇଥିବାରୁ ତାଙ୍କ ଉପରେ ଚାପ ପକାଯାଇ ପ୍ରଥମେ ସମବାୟ ମନ୍ତ୍ରଣାଳୟର ସଚିବ ଏବଂ ପରେ ନିର୍ବାଚନ ଆୟୋଗର ବଡ଼ ପଦବୀରେ ବସାଗଲା।
ନୂତନ ସିଇସି ଆଇନ-୨୦୨୩ ଅଧୀନରେ ଗଠିତ ଚୟନ କମିଟିରେ ପ୍ରଧାନମନ୍ତ୍ରୀ, ଗୃହମନ୍ତ୍ରୀ ଏବଂ ବିରୋଧୀ ଦଳ ନେତା ରହିଥିଲେ, ଯାହା ଦ୍ୱାରା କାର୍ଯ୍ୟପାଳିକା ନିଜ ପସନ୍ଦର ବ୍ୟକ୍ତିଙ୍କୁ ନିଯୁକ୍ତି ଦେବାର ସୁଯୋଗ ପାଇଲା। ଏଭଳି ନିଯୁକ୍ତି ନିର୍ବାଚନ ଆୟୋଗ ଭଳି ସ୍ୱାଧୀନ ସାମ୍ବିଧାନିକ ସଂସ୍ଥାର ନିରପେକ୍ଷତା ଓ ଜନସାଧାରଣଙ୍କ ବିଶ୍ୱାସ ଉପରେ ପ୍ରଶ୍ନବାଚୀ ସୃଷ୍ଟି କରୁଛି ବୋଲି ସେ ପ୍ରକାଶ କରିଛନ୍ତି।
