୨୦ତମ ଗୁରୁ ଦେବପ୍ରସାଦ ପୁରସ୍କାର ଉତ୍ସବ: କୁଚିପୁଡ଼ି ନୃତ୍ୟ ଓ ‘ଶାମ୍-ଏ-ଗଜଲ’ରେ ବିମୋହିତ ଦର୍ଶକ
ଭୁବନେଶ୍ୱର (ନ୍ୟୁଜ୍ ଡେସ୍କ): ରାଜଧାନୀ ଭୁବନେଶ୍ୱରରେ ଅନୁଷ୍ଠିତ ହୋଇଯାଇଛି ‘୨୦ତମ ଗୁରୁ ଦେବପ୍ରସାଦ ପୁରସ୍କାର ଉତ୍ସବ ୨୦୨୬’ର ଦ୍ୱିତୀୟ ସନ୍ଧ୍ୟା। ଓଡ଼ିଶା ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ସହଯୋଗରେ ସାଂସ୍କୃତିକ ଅନୁଷ୍ଠାନ ‘ତ୍ରିଧାରା’ ପକ୍ଷରୁ ଏହି କାର୍ଯ୍ୟକ୍ରମ ଆୟୋଜନ କରାଯାଇଥିଲା।
ଏହି ସନ୍ଧ୍ୟାରେ ଶାସ୍ତ୍ରୀୟ ନୃତ୍ୟ ଓ ସଙ୍ଗୀତର ଏକ ମନମୁଗ୍ଧକର ସଙ୍ଗମ ଦେଖିବାକୁ ମିଳିଥିଲା। ପ୍ରଥମ କାର୍ଯ୍ୟକ୍ରମରେ ଯୁବ କୁଚିପୁଡ଼ି କଳାକାର ଶ୍ରୀ ଗୁରୁ ରାଜୁ ନିଜର ଆକର୍ଷଣୀୟ ଏକକ ନୃତ୍ୟ ପରିବେଷଣ କରି ଦର୍ଶକଙ୍କ ମନ ଜିଣିଥିଲେ। ଏହାପରେ ପ୍ରସିଦ୍ଧ ଗଜଲ ଗାୟକ ପଣ୍ଡିତ ଚନ୍ଦନ ଦାସଙ୍କ ‘ଶାମ୍-ଏ-ଗଜଲ’ କାର୍ଯ୍ୟକ୍ରମ ପୁରା ମାହୋଲକୁ ସୁରମୟ ଓ ଭାବପୂର୍ଣ୍ଣ କରିତୋଳିଥିଲା।
ଏହି ଉତ୍ସବରେ ଜଗସିଂହପୁର ସାଂସଦ ବିଭୂ ପ୍ରସାଦ ତରାଇ, ରାଜସ୍ୱ ପରିଷଦର ପୂର୍ବତନ ସଦସ୍ୟ ଅଶୋକ କୁମାର ତ୍ରିପାଠୀ, ‘ତ୍ରିଧାରା’ର ସଭାପତି ସୁରେଶ ଚନ୍ଦ୍ର ପଣ୍ଡା, କାର୍ଯ୍ୟକାରୀ ସଭାପତି ସିମାଞ୍ଚଳ ପଣ୍ଡା ଏବଂ ନିର୍ଦ୍ଦେଶକ ଗୁରୁ ଡକ୍ଟର ଗଜେନ୍ଦ୍ର କୁମାର ପଣ୍ଡା ପ୍ରମୁଖ ଅତିଥି ଭାବେ ଯୋଗଦେଇଥିଲେ। ଗୁରୁ ଡ. ଗଜେନ୍ଦ୍ର କୁମାର ପଣ୍ଡା, ରିନା ପଣ୍ଡା, ଆଶୁତୋଷ ପଣ୍ଡା ଓ ପ୍ରଭୁତୋଷ ପଣ୍ଡା କାର୍ଯ୍ୟକ୍ରମ ସଂଯୋଜନା କରିଥିବା ବେଳେ ଡ. ମୃତ୍ୟୁଞ୍ଜୟ ରଥ ମଞ୍ଚ ପରିଚାଳନା (ଆଙ୍କରିଂ) କରିଥିଲେ।
