ସଫେଇ କର୍ମଚାରୀଙ୍କ ସୁରକ୍ଷା ଓ ସମ୍ମାନ ଆମର ପ୍ରାଥମିକତା: ‘ଗରିମା’ ପ୍ରଦର୍ଶନୀ ଉଦଘାଟନ କଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ
ଭୁବନେଶ୍ୱର:
ସଫେଇ କର୍ମଚାରୀମାନଙ୍କୁ ସମାଜରେ ଉଚିତ ସମ୍ମାନ, ସୁରକ୍ଷା ଓ ସ୍ୱାଭିମାନର ସହ ଜୀବନଜୀବିକା ଯୋଗାଇଦେବା ଆମ ସରକାରଙ୍କ ମୁଖ୍ୟ ଲକ୍ଷ୍ୟ। ଆଜି ଭୁବନେଶ୍ୱରସ୍ଥିତ ଲୋକସେବା ଭବନ କନଭେନସନ ସେଣ୍ଟରଠାରେ ଆୟୋଜିତ “ଗରିମା – ଦ୍ୱିତୀୟ ଜାତୀୟ କର୍ମଶାଳା”ର ଶୁଭାରମ୍ଭ କରି ଏହା କହିଛନ୍ତି ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ। ଏହି ଅବସରରେ ମୁଖ୍ୟମନ୍ତ୍ରୀ ମୁଖ୍ୟ ଅତିଥି ଭାବେ ଯୋଗଦେଇ ‘ଗରିମା ପ୍ରଦର୍ଶନୀ’ର ଆନୁଷ୍ଠାନିକ ଉଦଘାଟନ କରିଛନ୍ତି।
କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ କହିଛନ୍ତି ଯେ, ସହରକୁ ସ୍ୱଚ୍ଛ ଓ ନିର୍ମଳ ରଖିବାରେ ସଫେଇ କର୍ମଚାରୀମାନଙ୍କର ଅବଦାନ ଅତୁଲନୀୟ। ସେମାନଙ୍କ ସ୍ୱାସ୍ଥ୍ୟ ଓ ସୁରକ୍ଷାକୁ ନିଶ୍ଚିତ କରିବା ପାଇଁ ‘ଗରିମା’ ଯୋଜନା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ସଫେଇ କାର୍ଯ୍ୟରେ ମାନବଚାଳିତ ପ୍ରକ୍ରିୟାକୁ କମ୍ କରି ଯନ୍ତ୍ରପାତିର ବ୍ୟବହାର ବଢ଼ାଇବା ଉପରେ ସରକାର ବିଶେଷ ଗୁରୁତ୍ୱ ଦେଉଛନ୍ତି, ଯାହାଦ୍ୱାରା ସଫେଇ କର୍ମଚାରୀମାନେ ବିପଦମୁକ୍ତ ପରିବେଶରେ କାମ କରିପାରିବେ।
ଉଦଘାଟିତ ପ୍ରଦର୍ଶନୀରେ ସଫେଇ କାର୍ଯ୍ୟରେ ବ୍ୟବହୃତ ହେଉଥିବା ଆଧୁନିକ ଯନ୍ତ୍ରପାତି, ସୁରକ୍ଷା ଉପକରଣ (PPE Kits) ଏବଂ ନୂତନ ପ୍ରଯୁକ୍ତିବିଦ୍ୟାର ପ୍ରଦର୍ଶନ କରାଯାଇଛି। ଏହି ଦ୍ୱିତୀୟ ଜାତୀୟ କର୍ମଶାଳାରେ ରାଜ୍ୟ ଓ ରାଜ୍ୟ ବାହାରୁ ଆସିଥିବା ସହରୀ ପରିମଳ ବିଶେଷଜ୍ଞ, ପ୍ରଶାସନିକ ଅଧିକାରୀ ଏବଂ ସଫେଇ କର୍ମଚାରୀମାନେ ଯୋଗଦେଇ ନିଜ ନିଜର ଅନୁଭୂତି ଓ ସଫଳ କୌଶଳ ସମ୍ପର୍କରେ ଆଲୋଚନା କରିଛନ୍ତି।
ଏହି କାର୍ଯ୍ୟକ୍ରମରେ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗର ବରିଷ୍ଠ ଅଧିକାରୀଙ୍କ ସମେତ ବହୁ ଗଣ୍ୟମାନ୍ୟ ବ୍ୟକ୍ତି ଉପସ୍ଥିତ ଥିଲେ।
