ହାଇଦ୍ରାବାଦରେ ଦୁର୍ଘଟଣା: ସାଂସଦଙ୍କ ପୁଅଙ୍କ ଦ୍ରୁତଗାମୀ କାର୍ ଧକ୍କାରେ ଓଡ଼ିଆ ଝିଅ ଭାରତୀ ମୁଖୀଙ୍କ ମୃତ୍ୟୁ
ହାଇଦ୍ରାବାଦ:ହାଇଦ୍ରାବାଦର ମାଧାପୁର ଅଞ୍ଚଳରେ ଘଟିଛି ଏକ ଦୁଃଖଦ ସଡ଼କ ଦୁର୍ଘଟଣା। ଆନ୍ଧ୍ରପ୍ରଦେଶର ଜନସେନା ପାର୍ଟି ରାଜ୍ୟସଭା ସାଂସଦ ଲିଙ୍ଗମାନେନି ରମେଶଙ୍କ ପୁଅଙ୍କ ଦ୍ରୁତଗାମୀ ଆଷ୍ଟନ ମାର୍ଟିନ୍ କାର୍ ଧକ୍କାରେ ଜଣେ ୨୬ ବର୍ଷୀୟା ଓଡ଼ିଆ ଯୁବତୀଙ୍କ ଜୀବନ ଯାଇଛି। ମୃତ ଯୁବତୀ ଜଣକ ହେଲେ ଓଡ଼ିଶାର ଭାରତୀ ମୁଖୀ।
ମିଳିଥିବା ସୂଚନା ଅନୁଯାୟୀ, ଭାରତୀ ହାଇଦ୍ରାବାଦର ଇନଓରବିଟ୍ ମଲ୍ସ୍ଥିତ ‘ଲାଇଫଷ୍ଟାଇଲ୍’ ଷ୍ଟୋରରେ ସେଲ୍ସ ଏକଜିକ୍ୟୁଟିଭ୍ ଭାବେ କାର୍ଯ୍ୟ କରୁଥିଲେ। ଅଗଷ୍ଟ ୧୬ ତାରିଖ ଅପରାହ୍ନ ପ୍ରାୟ ୩ଟା ସମୟରେ ସେ ନିଜ ସହକର୍ମୀଙ୍କ ସହ ମଲ୍ ବାହାରକୁ ମାଧାପୁର ନିକଟସ୍ଥ ଏକ ହୋଟେଲରୁ ମଧ୍ୟାହ୍ନ ଭୋଜନ ଆଣିବାକୁ ଯାଇଥିଲେ। ଫେରିବା ସମୟରେ ରାସ୍ତା ପାର ହେଉଥିବା ବେଳେ ବେପରୁଆ ଭାବେ ଆସୁଥିବା ଏକ ଦ୍ରୁତଗାମୀ ବିଳାସପୂର୍ଣ୍ଣ କାର୍ (TG-09-G-0666) ତାଙ୍କୁ ଜୋରଦାର ଧକ୍କା ଦେଇଥିଲା।
ଧକ୍କା ଫଳରେ ଭାରତୀଙ୍କ ମୁଣ୍ଡରେ ଗମ୍ଭୀର ଆଘାତ ଲାଗିଥିଲା। ତାଙ୍କୁ ତୁରନ୍ତ ସେହି କାର୍ରେ ଜୁବିଲି ହିଲ୍ସସ୍ଥିତ ଆପୋଲୋ ହସ୍ପିଟାଲକୁ ନିଆଯାଇଥିଲା, ମାତ୍ର ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ଘଟଣା ପରେ ମାଧାପୁର ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। କାର୍ ଚଳାଉଥିବା ୨୧ ବର୍ଷୀୟ ଲିଙ୍ଗମାନେନି ସଞ୍ଜୁଷଙ୍କ ବିରୋଧରେ ଭାରତୀୟ ନାୟିକ ସଂହିତା (BNS) ର ସେକ୍ସନ ୧୦୬(୧) ଅଧୀନରେ ମାମଲା ରୁଜୁ କରାଯାଇଛି। ପୋଲିସ ଦୁର୍ଘଟଣାଗ୍ରସ୍ତ କାର୍ଟିକୁ ଜବତ କରିଛି।
ଓଡ଼ିଶାରେ ରହୁଥିବା ଭାରତୀଙ୍କ ପରିବାର ପାଇଁ ସେ ଏକମାତ୍ର ରୋଜଗାରିଆ ବ୍ୟକ୍ତି ଥିଲେ। ତାଙ୍କ ଅକାଳ ବିୟୋଗରେ ପରିବାରରେ ଶୋକର ଛାୟା ଖେଳିଯାଇଛି।
