ସ୍ଥଗିତ ରହିଲା ବ୍ୟାଙ୍କ ଧର୍ମଘଟ: ସାଧାରଣ ଦିନ ପରି ଖୋଲା ରହିବ ସବୁ ବ୍ୟାଙ୍କ
ଆଜିଠାରୁ (ସେପ୍ଟେମ୍ବର ୨୮) ଆରମ୍ଭ ହେବାକୁ ଥିବା ତିନି ଦିନିଆ ସାରା ଦେଶବ୍ୟାପୀ ବ୍ୟାଙ୍କ ଧର୍ମଘଟକୁ ସ୍ଥଗିତ ରଖାଯାଇଛି। ୟୁନାଇଟେଡ ଫୋରମ୍ ଅଫ୍ ବ୍ୟାଙ୍କ ୟୁନିଅନ୍ସ (UFBU) ଏବଂ ଇଣ୍ଡିଆନ୍ ବ୍ୟାଙ୍କସ ଆସୋସିଏସନ୍ (IBA) ମଧ୍ୟରେ ଅନୁଷ୍ଠିତ ଏକ ଗୁରୁତ୍ୱପୂର୍ଣ୍ଣ ଆଲୋଚନା ପରେ ଏହି ନିଷ୍ପତ୍ତି ନିଆଯାଇଛି।
ରବିବାର ରାତିରେ ଦୁଇ ପକ୍ଷ ମଧ୍ୟରେ ହୋଇଥିବା ବୈଠକରେ ବ୍ୟାଙ୍କ କର୍ମଚାରୀଙ୍କ ମୁଖ୍ୟ ଦାବିଗୁଡ଼ିକ ଉପରେ ସହମତି ପ୍ରକାଶ ପାଇଛି। ବିଶେଷ କରି ସପ୍ତାହରେ ୫ ଦିନିଆ କାର୍ଯ୍ୟଦିବସ (ସବୁ ଶନିବାର ଛୁଟି) ଲାଗୁ କରିବା ପାଇଁ ଏକ ଉଚ୍ଚସ୍ତରୀୟ କମିଟି ଗଠନ କରିବାକୁ ନିଷ୍ପତ୍ତି ହୋଇଛି। ଏହା ସହିତ ଅଫିସରମାନଙ୍କ ପରଫରମାନ୍ସ ଲିଙ୍କଡ୍ ଇନସେଣ୍ଟିଭ୍ (PLI) ସ୍କିମ୍ରେ ସୁଧାର ଆଣିବା ଏବଂ ଅନ୍ୟାନ୍ୟ ବାକି ଥିବା ସମସ୍ୟାର ସମାଧାନ ପାଇଁ IBA ଆଶ୍ୱାସନା ଦେଇଛି।
ଧର୍ମଘଟ ପ୍ରତ୍ୟାହୃତ ହୋଇଥିବାରୁ ଆଜିଠାରୁ ସମସ୍ତ ସରକାରୀ ଓ ବେସରକାରୀ ବ୍ୟାଙ୍କରେ ସେବା ସ୍ୱାଭାବିକ ରହିବ, ଯାହା ଦ୍ୱାରା ମାସ ଶେଷରେ ସାଧାରଣ ଗ୍ରାହକଙ୍କୁ ଆଶ୍ୱସ୍ତି ମିଳିଛି।
