ନିର୍ବାଚନ ଆୟୋଗ ବିବାଦ: ରାହୁଲ ଗାନ୍ଧୀଙ୍କୁ ଘେରିବାକୁ ବିଜେପିର ‘୧୨ ମୁଖ୍ୟମନ୍ତ୍ରୀ’ ଫର୍ମୁଲା, ଜ୍ଞାନେଶ କୁମାରଙ୍କ ସପକ୍ଷରେ ଓହ୍ଲାଇଲା ଶାସକ ଦଳ
ନୂଆଦିଲ୍ଲୀ:
ମୁଖ୍ୟ ନିର୍ବାଚନ ଆୟୁକ୍ତ (CEC) ଜ୍ଞାନେଶ କୁମାର ଏବଂ ନିର୍ବାଚନ ଆୟୋଗଙ୍କୁ ନେଇ ଦେଶରେ ରାଜନୀତି ଏବେ ସରଗରମ। ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ କ୍ରମାଗତ ଆକ୍ରମଣର କଡ଼ା ଜବାବ ଦେବା ପାଇଁ ବିଜେପି ଏକ ବଡ଼ ‘ରାଜନୈତିକ ବ୍ୟୁହ’ ରଚନା କରିଛି। ରାହୁଲଙ୍କ ଅଭିଯୋଗକୁ ମିଛ ପ୍ରମାଣିତ କରିବା ଏବଂ ମୁଖ୍ୟ ନିର୍ବାଚନ ଆୟୁକ୍ତଙ୍କ ସପକ୍ଷରେ ବାହାରି ବିଜେପି ଏକାସଙ୍ଗରେ ନିଜର ୧୨ ଜଣ ମୁଖ୍ୟମନ୍ତ୍ରୀଙ୍କୁ ମୈଦାନକୁ ଓହ୍ଲାଇଛି।
କାହିଁକି ବଢ଼ିଲା ବିବାଦ?
ନିକଟରେ ଭୋଟର ତାଲିକା ସଂଶୋଧନ (SIR) ଏବଂ ନିର୍ବାଚନ ଆୟୋଗଙ୍କ ଭିତରକଥାକୁ ନେଇ କିଛି ଗଣମାଧ୍ୟମ ରିପୋର୍ଟ ଆସିବା ପରେ ରାହୁଲ ଗାନ୍ଧୀ ଶାସକ ଦଳ ଓ ନିର୍ବାଚନ ଆୟୋଗଙ୍କ ଉପରେ ବର୍ଷିଥିଲେ। ରାହୁଲ ଅଭିଯୋଗ କରିଥିଲେ ଯେ, “ନିର୍ବାଚନରେ ଭୋଟ ଚୋରି ହେଉଛି ଏବଂ ଆୟୋଗଙ୍କ ଅନ୍ୟ ଦୁଇଜଣ ଆୟୁକ୍ତ ମଧ୍ୟ ଜ୍ଞାନେଶ କୁମାରଙ୍କ ନିଷ୍ପତ୍ତିରେ ଅସନ୍ତୁଷ୍ଟ ଥିଲେ”। ଏହାସହ ସେ ମୁଖ୍ୟ ନିର୍ବାଚନ ଆୟୁକ୍ତ ଜ୍ଞାନେଶ କୁମାରଙ୍କ ଇସ୍ତଫା ଦାବି କରିଥିଲେ।
ବିଜେପିର କଡ଼ା ପଲଟା ଆକ୍ରମଣ:
ରାହୁଲଙ୍କ ଏହି ଅଭିଯୋଗ ପରେ ବିଜେପି ନିଜର ୧୨ ଜଣ ମୁଖ୍ୟମନ୍ତ୍ରୀ (ଯେଉଁଥିରେ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ, ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଏକନାଥ ସିନ୍ଧେ ପ୍ରମୁଖ ସାମିଲ ଅଛନ୍ତି) ଏବଂ କେନ୍ଦ୍ରମନ୍ତ୍ରୀ କିରେନ୍ ରିଜିଜୁଙ୍କୁ ନେଇ ଏକାସଙ୍ଗରେ ସାମ୍ବାଦିକ ସମ୍ମିଳନୀ କରିଛି।
ବିଜେପି ନେତାମାନେ କହିଛନ୍ତି ଯେ, କଂଗ୍ରେସ ଏବଂ ‘ଇଣ୍ଡିଆ’ ମେଣ୍ଟ ନିର୍ବାଚନ ହାରିବା ପରେ ସାମ୍ବିଧାନିକ ଅନୁଷ୍ଠାନଗୁଡ଼ିକୁ ବଦନାମ୍ କରିବାକୁ ଚେଷ୍ଟା କରୁଛନ୍ତି। ଭୋଟର ତାଲିକା ସଂଶୋଧନ (SIR) କୌଣସି ନୂଆ କଥା ନୁହେଁ, ଏହା ପୂର୍ବରୁ ୧୯୫୨, ୧୯୫୭, ୧୯୬୧ ଏବଂ ୨୦୦୩ ମସିହାରେ ମଧ୍ୟ ହୋଇସାରିଛି। ଯେତେବେଳେ କଂଗ୍ରେସ ଜିତେ, ସେତେବେଳେ ନିର୍ବାଚନ ଆୟୋଗ ଠିକ୍ ଥାନ୍ତି, ହେଲେ ହାରିଗଲେ ସବୁ ଦୋଷ ଆୟୋଗ ଏବଂ EVM ଉପରେ ଲଦିଦିଆଯାଏ ବୋଲି ବିଜେପି କହିଛି।
ନିର୍ବାଚନ ଆୟୋଗଙ୍କ ସ୍ପଷ୍ଟୀକରଣ:
ଏହି ବିବାଦ ଭିତରେ ନିର୍ବାଚନ ଆୟୋଗ ମଧ୍ୟ ନିଜର ପକ୍ଷ ରଖିଛନ୍ତି। ଆୟୋଗ ସ୍ପଷ୍ଟ କରିଛନ୍ତି ଯେ, ଭୋଟର ତାଲିକା ସଂଶୋଧନ ସହ ଜଡ଼ିତ ସମସ୍ତ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ସମସ୍ତ ତିନିଜଣ ନିର୍ବାଚନ ଆୟୁକ୍ତଙ୍କ ସର୍ବସମ୍ମତି କ୍ରମେ ନିଆଯାଇଛି। କୌଣସି ବେଆଇନ କାମ ହୋଇନାହିଁ।
