ଦେଶକୁ ପୋଲିଓ ମୁକ୍ତ କରିଥିବା BIBCOL କାରଖାନା ବନ୍ଦ: ଅନିଶ୍ଚିତତାରେ ୧୦୦ରୁ ଉର୍ଦ୍ଧ୍ୱ କର୍ମଚାରୀଙ୍କ ଭବିଷ୍ୟତ
ବୁଲନ୍ଦସହର[News Inshot]: ଭାରତକୁ ପୋଲିଓ ମୁକ୍ତ କରିବାରେ ପ୍ରମୁଖ ଭୂମିକା ଗ୍ରହଣ କରିଥିବା ଉତ୍ତର ପ୍ରଦେଶ ବୁଲନ୍ଦସହରସ୍ଥିତ ସରକାରୀ ସଂସ୍ଥା ‘ଭାରତ ଇମ୍ୟୁନୋଲୋଜିକାଲ୍ସ ଆଣ୍ଡ ବାୟୋଲୋଜିକାଲ୍ସ କୋପୋରେସନ୍ ଲିମିଟେଡ୍’ (BIBCOL) ଆଜି ବନ୍ଦ ହେବାକୁ ଯାଉଛି। କେନ୍ଦ୍ର ସରକାର ୧୭ ସେପ୍ଟେମ୍ବର ୨୦୨୬ରେ ଏହି ଐତିହାସିକ କାରଖାନାକୁ ଆନୁଷ୍ଠାନିକ ଭାବେ ବନ୍ଦ କରିବା ପାଇଁ ମଞ୍ଜୁରୀ ଦେଇଛନ୍ତି। ଫଳରେ ଗତ କିଛି ବର୍ଷ ହେବ ବକେୟା ଦରମା ଓ ସେବା ସର୍ତ୍ତକୁ ନେଇ ସଂଗ୍ରାମ କରୁଥିବା କର୍ମଚାରୀମାନଙ୍କ ପାଇଁ ପୁନରୁଦ୍ଧାରର ସମସ୍ତ ଆଶା ମାଟିରେ ମିଶିଯାଇଛି।
୧୯୮୯ ମସିହାରେ ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ସମୟରେ ରୁଷର ସହାୟତାରେ ସ୍ଥାପିତ ଏହି ସରକାରୀ ଉଦ୍ୟୋଗ ଦେଶର ମୋଟ ପୋଲିଓ ଟିକାର ପ୍ରାୟ ୬୦ ପ୍ରତିଶତ ଯୋଗାଇ ଦେଉଥିଲା। ତେବେ ଡିସେମ୍ବର ୨୦୨୨ରୁ ଏଠାରେ ଟିକା ଉତ୍ପାଦନ ସମ୍ପୂର୍ଣ୍ଣ ବନ୍ଦ ରହିଛି। କୋଭାକ୍ସିନ୍ ତିଆରି ପାଇଁ ଅନୁଦାନ ମିଳିଥିଲେ ବି ତାହା କାର୍ଯ୍ୟକାରୀ ହୋଇପାରିନଥିଲା। କେବଳ ଗୋଟିଏ ଉତ୍ପାଦ ଉପରେ ନିର୍ଭରଶୀଳତା, ପରିଚାଳନାଗତ ତ୍ରୁଟି ଏବଂ ଆର୍ଥିକ ଅବ୍ୟବସ୍ଥା ଯୋଗୁଁ କମ୍ପାନୀ କ୍ରମାଗତ କ୍ଷତିର ସମ୍ମୁଖୀନ ହୋଇଥିଲା।
ଏହି ନିଷ୍ପତ୍ତି ଯୋଗୁଁ ସବୁଠାରୁ ବଡ଼ ପ୍ରଭାବ ପଡ଼ିଛି କାରଖାନାର ପ୍ରାୟ ୧୦୦ ଜଣ କର୍ମଚାରୀଙ୍କ ଉପରେ। ଡିସେମ୍ବର ୨୦୨୩ରୁ ସେମାନଙ୍କୁ ନିୟମିତ ଦରମା ମିଳିନାହିଁ। ସେମାନଙ୍କ ମଧ୍ୟରୁ ଅନେକ ଆର୍ଥିକ ସଙ୍କଟ ଓ ଚିକିତ୍ସା ଅଭାବରୁ ପ୍ରାଣ ହରାଇଥିବା ବେଳେ ଅନ୍ୟମାନେ ପରିବାର ପ୍ରତିପୋଷଣ ପାଇଁ ଗହଣା ଓ ଘରୋଇ ସମ୍ପତ୍ତି ବିକ୍ରି କରିବାକୁ ବାଧ୍ୟ ହୋଇଛନ୍ତି। କିଛି କର୍ମଚାରୀ ସରକାରଙ୍କଠାରୁ ଅନ୍ୟ କୌଣସି ପବ୍ଲିକ୍ ସେକ୍ଟରରେ ନିଯୁକ୍ତି କିମ୍ବା ବକେୟା ପ୍ରାପ୍ୟ ପାଇଁ ଦାବି କରୁଛନ୍ତି।
ସିଏଜି (CAG) ରିପୋର୍ଟରେ ମଧ୍ୟ ଏହି ସଂସ୍ଥାର ହିସାବ କିତାବରେ ଗଡ଼ବଡ଼ି ଓ ଅସହଯୋଗ ପ୍ରତି ଅଙ୍ଗୁଳି ନିର୍ଦ୍ଦେଶ କରାଯାଇଥିଲା। କଂଗ୍ରେସ ନେତା ରାହୁଲ ଗାନ୍ଧୀ ଏବଂ ଜୟରାମ ରମେଶ ସରକାରଙ୍କ ଏହି ପଦକ୍ଷେପକୁ କଡ଼ା ସମାଲୋଚନା କରିଛନ୍ତି। ଦେଶକୁ ରୋଗମୁକ୍ତ କରିବାରେ ବଡ଼ ଅବଦାନ ରଖିଥିବା ଏକ ପ୍ରତିଷ୍ଠିତ ସଂସ୍ଥା ଆଜି ଜନଶୂନ୍ୟ ଓ ଅବହେଳିତ ହୋଇପଡ଼ିବା ଅତ୍ୟନ୍ତ ଦୁଃଖଦାୟକ।
News source: ThePrint
