ନବୀ ମୁମ୍ବାଇରେ ଏକ୍ସପାୟରୀ ଡେଟ୍ ଠକେଇ: ତୁକାରାମ ମୁଣ୍ଡେଙ୍କ କଡ଼ା ଚଢ଼ାଉ, ୭୫ ଲକ୍ଷରୁ ଉର୍ଦ୍ଧ୍ୱ ଟଙ୍କାର ମ୍ୟାଗି ଓ ଲେଜ୍ ଜବତ
ନବୀ ମୁମ୍ବାଇ:
ଖାଉଟିଙ୍କ ସ୍ୱାସ୍ଥ୍ୟ ସହ ଖେଳୁଥିବା ଅସାଧୁ ବ୍ୟବସାୟୀଙ୍କ ଉପରେ ପୁଣି ଥରେ ନିଜର କଡ଼ା ଆଭିମୁଖ୍ୟ ଦେଖାଇଛନ୍ତି ମହାରାଷ୍ଟ୍ର ଫୁଡ୍ ଆଣ୍ଡ୍ ଡ୍ରଗ୍ସ ଆଡମିନିଷ୍ଟ୍ରେସନ୍ (FDA) କମିଶନର ତଥା ଚର୍ଚ୍ଚିତ IAS ଅଫିସର ତୁକାରାମ ମୁଣ୍ଡେ। ନବୀ ମୁମ୍ବାଇର ତୁର୍ଭେ ଶିଳ୍ପାଞ୍ଚଳରେ ଚାଲିଥିବା ଏକ ବଡ଼ ଧରଣର ନକଲି ଖାଦ୍ୟ ଲେବଲିଂ ଓ ଏକ୍ସପାୟରୀ ଡେଟ୍ ବଦଳାଇବା ରାକେଟ୍ର ପର୍ଦ୍ଦାଫାଶ କରିଛି FDA ଓ ପୋଲିସର ମିଳିତ ଟିମ୍।
ଏହି ଚଢ଼ାଉ ବେଳେ ଘଟଣାସ୍ଥଳରୁ ପ୍ରାୟ ୭୫.୨୧ ଲକ୍ଷ ଟଙ୍କାର ଏକ୍ସପାୟରୀ ହୋଇସାରିଥିବା ଖାଦ୍ୟ ସାମଗ୍ରୀ ଜବତ କରାଯାଇଛି।
ସାଂଘାତିକ ଠକେଇର ତରିକା:
ତଦନ୍ତରୁ ଜଣାପଡ଼ିଛି ଯେ, ‘ସାଧନା ଏଣ୍ଟରପ୍ରାଇଜେସ୍’ ନାମକ ଏକ ସଂସ୍ଥା ଏକ୍ସପାୟରୀ ହୋଇସାରିଥିବା ଖାଦ୍ୟ ପ୍ୟାକେଟ୍ରୁ ପୁରୁଣା ତାରିଖ ଓ ଉପାଦାନ ଲେବଲ୍ ଲିଭାଇ ଦେଉଥିଲା। ତା’ ପରିବର୍ତ୍ତେ ନୂଆ ତିଆରି ତାରିଖ ଓ ବର୍ଦ୍ଧିତ ଏକ୍ସପାୟରୀ ଡେଟ୍ର ନକଲି ଷ୍ଟିକର ଲଗାଇ ବଜାରକୁ ଛାଡ଼ିବା ପାଇଁ ପ୍ରସ୍ତୁତି ଚାଲିଥିଲା।
ଜବତ ହୋଇଥିବା ବ୍ରାଣ୍ଡେଡ୍ ସାମଗ୍ରୀ:
ସିଜ୍ ହୋଇଥିବା ୪,୯୪୨ଟି କାର୍ଟନ୍ ମଧ୍ୟରେ ଲୋକପ୍ରିୟ ବ୍ରାଣ୍ଡ୍ଗୁଡ଼ିକର ଖାଦ୍ୟ ସାମଗ୍ରୀ ରହିଛି:
-
କୁରକୁରେ ଓ ଲେଜ୍: ଲେଜ୍ର କ୍ଲାସିକ୍ ସଲ୍ଟେଡ୍, ମ୍ୟାଜିକ୍ ମସଲା, ସିଜଲିଂ ହଟ୍ ଏବଂ କୁରକୁରେର ମସଲା ମଞ୍ଚ, ଗ୍ରୀନ୍ ଚଟଣୀ ଭଳି ବିଭିନ୍ନ ଭାସ୍କର ପ୍ରକାର।
-
ନୁଡୁଲ୍ସ ଓ ସୁପ୍: ମ୍ୟାଗି ମସଲା, ମ୍ୟାଗି ଆଟା ନୁଡୁଲ୍ସ ଓ ନୋର୍ (Knorr) ମସ୍ରୁମ୍ ସୁପ୍।
-
ଅନ୍ୟାନ୍ୟ: ହେଲମ୍ୟାନ୍ସ ମାୟୋନିଜ୍, ଥମ୍ସ ଅପ୍ ଓ ଲିମକା କ୍ୟାନ୍ ଏବଂ କେତେକ ରେଡି-ଟୁ-ଇଟ୍ ପ୍ୟାକେଟ୍।
ଦୃଢ଼ କାର୍ଯ୍ୟାନୁଷ୍ଠାନ:
ଏହି ଘଟଣା ପରେ FDA ତୁରନ୍ତ ‘ସାଧନା ଏଣ୍ଟରପ୍ରାଇଜେସ୍’ର ଫୁଡ୍ ଲାଇସେନ୍ସ ବାତିଲ କରିଛି। ଏହା ସହ ତୁର୍ଭେ ପୋଲିସ ଷ୍ଟେସନରେ ଏକ ସାଂଘାତିକ ମାମଲା (FIR) ରୁଜୁ କରାଯାଇଛି।
ସୂଚନାଯୋଗ୍ୟ ଯେ, ଏହି ନକଲି ସାମଗ୍ରୀଗୁଡ଼ିକୁ ବିଦେଶକୁ ରପ୍ତାନି କରୁଥିବା ୧୦ଟି ରପ୍ତାନିକାରୀ ସଂସ୍ଥା ସହ ଏହାର ଲିଙ୍କ୍ ଥିବା ସାମ୍ନାକୁ ଆସିଛି। “ଜନସାଧାରଣଙ୍କ ସ୍ୱାସ୍ଥ୍ୟ ସହ କୌଣସି ପ୍ରକାର ଆପୋଷ ବୁଝାମଣା କରାଯିବ ନାହିଁ” ବୋଲି FDA କମିଶନର ତୁକାରାମ ମୁଣ୍ଡେ କଡ଼ା ଚେତାବନୀ ଦେଇଛନ୍ତି।
