ଅଧିକ ପେନସନ୍ ବିବାଦ: ଏବେ ରାଷ୍ଟ୍ରପତିଙ୍କ ଦ୍ୱାରସ୍ଥ ହେଲେ ଅବସରପ୍ରାପ୍ତ କର୍ମଚାରୀ; EPFO ବିରୋଧରେ ଶୋଷଣ ଅଭିଯୋଗ
ନୂଆଦିଲ୍ଲୀ: କର୍ମଚାରୀ ଭବିଷ୍ୟ ନିଧି ସଂଗଠନ (EPFO) ର କଠୋର ନିୟମ ଯୋଗୁଁ ଅଧିକ ପେନସନ୍ରୁ ବଞ୍ଚିତ ହେଉଥିବା ଲକ୍ଷାଧିକ ଅବସରପ୍ରାପ୍ତ କର୍ମଚାରୀ ଏବେ ସିଧାସଳଖ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ହସ୍ତକ୍ଷେପ ଲୋଡ଼ିଛନ୍ତି| ପ୍ରଧାନମନ୍ତ୍ରୀଙ୍କୁ ଚିଠି ଲେଖିବା ପରେ, ଏବେ ‘ନ୍ୟାସନାଲ କନଫେଡେରେସନ ଅଫ ପେନସନରସ ଆସୋସିଏସନ’ (NCPA) ପକ୍ଷରୁ ରାଷ୍ଟ୍ରପତିଙ୍କୁ ପତ୍ର ଲେଖି EPFO ର ମନମୁଖୀ କାର୍ଯ୍ୟାନୁଷ୍ଠାନ ଏବଂ ଆବେଦନ ନାକଚ ନୀତି ଉପରେ ରୋକ୍ ଲଗାଇବାକୁ ନିବେଦନ କରାଯାଇଛି|
ସଂଘର ଅଭିଯୋଗ ଅନୁଯାୟୀ, EPFO ର ଜାନୁଆରୀ ୧୮, ୨୦୨୫ ସର୍କୁଲାରର ଆଢୁଆଳରେ ଅନେକ ଆବେଦନକୁ ବେଆଇନ ଭାବେ ରଦ୍ଦ କରାଯାଉଛି| ବିଶେଷ କରି ସରକାରୀ ଓ ବେସରକାରୀ ଟ୍ରଷ୍ଟ (Exempted Establishments) ଅଧୀନରେ କାମ କରୁଥିବା କର୍ମଚାରୀଙ୍କୁ ‘ଆନ୍ତରୀଣ ଟ୍ରଷ୍ଟ ନିୟମ’ର ବାହାନା ଦେଇ ଅଧିକ ପେନସନ୍ ଦିଆଯାଉନାହିଁ| ଗୋଟିଏ ସଂସ୍ଥାର କିଛି କର୍ମଚାରୀଙ୍କୁ ଏହି ସୁବିଧା ମିଳୁଥିବା ବେଳେ ଅନ୍ୟମାନଙ୍କୁ ବଞ୍ଚିତ କରାଯିବା ସମ୍ବିଧାନର ୧୪ ଏବଂ ୨୧ ଧାରାର ଉଲ୍ଲଂଘନ ବୋଲି NCPA ଦର୍ଶାଇଛି|
ରାଷ୍ଟ୍ରପତିଙ୍କ ନିକଟରେ ସଂଘର ୩ଟି ମୁଖ୍ୟ ଦାବି:
-
ଅବିଳମ୍ବେ ସର୍କୁଲାର ପ୍ରତ୍ୟାହାର: EPFO ର ଜାନୁଆରୀ ୧୮, ୨୦୨୫ ସର୍କୁଲାରକୁ ସମ୍ପୂର୍ଣ୍ଣ ଭାବେ ରଦ୍ଦ କରାଯାଉ, ଯାହା ଆଧାରରେ ଯୋଗ୍ୟ ଆବେଦନଗୁଡ଼ିକୁ ନାକଚ କରାଯାଉଛି|
-
ମାମଲା ବନ୍ଦ ଓ ସମାନତା: ବିଭିନ୍ନ ହାଇକୋର୍ଟ ପେନସନଭୋଗୀଙ୍କ ପକ୍ଷରେ ରାୟ ଦେଇସାରିଥିବାରୁ EPFO ଅଯଥା କୋର୍ଟ କଚେରୀ କାମ ବନ୍ଦ କରୁ ଏବଂ ସମସ୍ତ ଅବସରପ୍ରାପ୍ତ କର୍ମଚାରୀଙ୍କୁ ସମାନ ନଜରରେ ଦେଖୁ|
-
ଜରିମାନା ସୁଧ ଛାଡ଼: EPFO ର ପ୍ରଶାସନିକ ବିଳମ୍ବ ଯୋଗୁଁ ଆବେଦନକାରୀଙ୍କ ଉପରେ ଲଦି ଦିଆଯାଇଥିବା ଅତିରିକ୍ତ ସୁଧ କିମ୍ବା ଜରିମାନା ସମ୍ପୂର୍ଣ୍ଣ ଛାଡ଼ କରାଯାଉ|
ଅବସର ପରେ ବୃଦ୍ଧାବସ୍ଥାରେ ପେନସନଭୋଗୀମାନେ ଅତି କମ୍ ଟଙ୍କାରେ ଗୁଜରାଣ ମେଣ୍ଟାଉଥିବା ବେଳେ, EPFO ର ଏପରି କଠୋର ଆଭିମୁଖ୍ୟ ସେମାନଙ୍କୁ ଆର୍ଥିକ ଓ ମାନସିକ ଯନ୍ତ୍ରଣା ଦେଉଛି| ଏଣୁ ଶ୍ରମ ମନ୍ତ୍ରଣାଳୟ ଓ EPFO କୁ ତୁରନ୍ତ ନିର୍ଦ୍ଦେଶ ଦେଇ ସମସ୍ୟାର ସମାଧାନ କରିବାକୁ ସଂଘ ନିବେଦନ କରିଛି|
