ଇ-ବୁକ୍ ପଢ଼ି ରୋଜଗାର କରିବା ଆଶାରେ ୧.୨୫ କୋଟି ହରାଇଲେ ୧୦୦ରୁ ଅଧିକ ଲୋକ
ତିରୁବନନ୍ତପୁରମ୍:
ସହଜରେ ଘରେ ବସି ଟଙ୍କା ରୋଜଗାର କରିବାର ଲୋଭ ଦେଖାଇ ପୁଣି ଏକ ବଡ଼ ଧରଣର ସାଇବର ଠକାମି ସାମ୍ନାକୁ ଆସିଛି। କେବଳ କିଛି ଇ-ବୁକ୍ (E-books) ପଢ଼ି ଦୈନିକ ରୋଜଗାର କରିବାର ପ୍ରଲୋଭନ ଦେଖାଇ ୧୦୦ରୁ ଅଧିକ ଲୋକଙ୍କଠାରୁ ପ୍ରାୟ ୧.୨୫ କୋଟି ଟଙ୍କା ଲୁଟି ନେଇଛନ୍ତି ସାଇବର୍ ଠକ୍। ଏହି ଘଟଣାରେ ପୀଡ଼ିତମାନେ ସଂଘବଦ୍ଧ ଭାବେ ତିରୁବନନ୍ତପୁରମ୍ ରୁରାଲ ସାଇବର ପୁଲିସ୍ ଷ୍ଟେସନରେ ଅଭିଯୋଗ କରିଛନ୍ତି।
କିପରି ହେଲା ଠକାମି?
ପୁଲିସର ସୂଚନା ଅନୁସାରେ, ଠକମାନେ ‘NTL App’ ନାମକ ଏକ ଆପ୍ସ ଜରିଆରେ ଏହି ଜାଲ ବିଛାଇଥିଲେ। ପ୍ରଥମେ ସ୍ଥାନୀୟ ଅଞ୍ଚଳର କିଛି ଜଣାଶୁଣା ବ୍ୟକ୍ତିଙ୍କ ପାଖକୁ ୱାଟ୍ସଆପ୍ରେ ଏହି ଆପ୍ସର ଲିଙ୍କ୍ ପଠାଯାଉଥିଲା, ଯାହାଦ୍ୱାରା ଅନ୍ୟମାନଙ୍କ ବିଶ୍ୱାସ ଜିତିବା ସହଜ ହୋଇଥିଲା।
-
ଫିସ୍ ଓ ଟାସ୍କ: ଆପ୍ରେ ଯୋଡ଼ିହେବା ପାଇଁ ୧,୮୦୦ ଟଙ୍କାରୁ ଆରମ୍ଭ କରି ଲକ୍ଷାଧିକ ଟଙ୍କାର ପ୍ଲାନ ରହିଥିଲା। ଇ-ବୁକ୍ ପଢ଼ିଲେ ବହି ପିଛା ୨୫ ଟଙ୍କା ଏବଂ ନୂଆ ସଦସ୍ୟ ଯୋଡ଼ିଲେ କମିସନ ମିଳିବାର ପ୍ରତିଶ୍ରୁତି ଦିଆଯାଇଥିଲା।
-
ଅଟକିଗଲା ଟଙ୍କା: ପ୍ରଥମେ ପ୍ରଥମେ କିଛି ଲୋକଙ୍କୁ ସାମାନ୍ୟ ପେମେଣ୍ଟ ଦେଇ ବିଶ୍ୱାସ ଜନ୍ମାଯାଇଥିଲା। କିନ୍ତୁ ପରେ ଟଙ୍କା ଉଠାଣ (Withdrawal) ବନ୍ଦ ହୋଇଯାଇଥିଲା ଏବଂ ଆପ୍ଟି ସମ୍ପୂର୍ଣ୍ଣ ଅଚଳ ହୋଇପଡ଼ିଥିଲା।
ତଦନ୍ତରେ ବିଦେଶୀ ଲିଙ୍କ୍
ଏହି ଠକାମି ପଛରେ ଥୋଲିକୋଡ୍ର ସାନୋଫାର ନାମକ ଜଣେ ବ୍ୟକ୍ତିଙ୍କୁ ମୁଖ୍ୟ ସନ୍ଦିଗ୍ଧ କୁହାଯାଉଥିଲେ ବି ପୁଲିସ୍ର କହିବା ଅନୁସାରେ ସେ କେବଳ ଗୋଟିଏ ମାଧ୍ୟମ। ଏହି ପୂରା ଗ୍ୟାଙ୍ଗର ଲିଙ୍କ୍ ୟୁକେ (UK) ଏବଂ ଆମେରିକାର ଏକ କମ୍ପାନୀ ସହ ଯୋଡ଼ିହୋଇଥିବା ସନ୍ଦେହ କରାଯାଉଛି।
ସାଇବର ସେଲ୍ ପକ୍ଷରୁ ସାଧାରଣ ଲୋକଙ୍କୁ ଏପରି କୌଣସି ବି ଅଜଣା ଆପ୍ସ ବା ୱାଟ୍ସଆପ୍ ଲିଙ୍କ୍ ଜରିଆରେ ଟଙ୍କା ନିବେଶ ନକରିବାକୁ ସଚେତନ କରାଯାଇଛି।
