ମହିଳା ସୁରକ୍ଷାକୁ ନେଇ କଠୋର ଦିଲ୍ଲୀ ହାଇକୋର୍ଟ: ଓଲା, ଉବର, ରାପିଡୋକୁ କାରଣ ଦର୍ଶାଅ ନୋଟିସ
ନୂଆଦିଲ୍ଲୀ:
ଆପ୍-ଭିତ୍ତିକ ଟ୍ୟାକ୍ସି ସେବାରେ ମହିଳାମାନଙ୍କ ସୁରକ୍ଷାକୁ ନେଇ ଦିଲ୍ଲୀ ହାଇକୋର୍ଟ ଏକ ବଡ଼ କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି। ଓଲା, ଉବର ଏବଂ ରାପିଡୋ ଭଳି ପ୍ରମୁଖ ରାଇଡ୍-ହେଲିଂ କମ୍ପାନୀଗୁଡ଼ିକ ସହ କେନ୍ଦ୍ର ଓ ଦିଲ୍ଲୀ ସରକାରଙ୍କୁ କୋର୍ଟ ନୋଟିସ ଜାରି କରିଛନ୍ତି। ମହିଳା ଯାତ୍ରୀଙ୍କ ସୁରକ୍ଷା ପାଇଁ କି ପ୍ରକାର ପଦକ୍ଷେପ ନିଆଯାଉଛି, ସେ ସମ୍ପର୍କରେ ଜବାବ ରଖିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି।
ମୁଖ୍ୟ ବିଚାରପତି ଦେବେନ୍ଦ୍ର କୁମାର ଉପାଧ୍ୟାୟ ଏବଂ ବିଚାରପତି ତେଜସ କାରିଆଙ୍କୁ ନେଇ ଗଠିତ ଖଣ୍ଡପୀଠ ଆଦିତ୍ୟ ସେହଗଲ ନାମକ ଜଣେ ବ୍ୟକ୍ତିଙ୍କ ଜନସ୍ୱାର୍ଥ ମାମଲାର (PIL) ଶୁଣାଣି କରି ଏହି ନୋଟିସ ଜାରି କରିଛନ୍ତି। ଶୁଣାଣି ସମୟରେ କୋର୍ଟ ସ୍ପଷ୍ଟ କରିଛନ୍ତି ଯେ, “ଆମେ ଆପ୍ ମାଧ୍ୟମରେ ଚାଲୁଥିବା ବେସରକାରୀ ଟ୍ୟାକ୍ସି ସେବା ପ୍ରଦାନକାରୀଙ୍କୁ ଅଧିକ ଜବାବଦାରି କରିବାକୁ ଚାହୁଁଛୁ।’”
ଯାଚିକାରେ ଉଠିଥିବା ମୁଖ୍ୟ ପ୍ରସଙ୍ଗ:
-
ରାତି ସମୟରେ ଚେକିଂର ଅଭାବ: ଦିଲ୍ଲୀ-ଏନସିଆର ଅଞ୍ଚଳରେ ରାତି ସମୟରେ ନିୟମିତ ଡ୍ରାଇଭର ଚେକିଂ ହେଉ ନଥିବାରୁ ମହିଳା ଯାତ୍ରୀମାନେ ଅସୁରକ୍ଷିତ ମଣୁଛନ୍ତି।
-
ଭୁଲ ଡ୍ରାଇଭର ଆସିଲେ ଜରିମାନା ନାହିଁ: ଆପ୍ରେ ଦେଖାଉଥିବା ଡ୍ରାଇଭର କିମ୍ବା ଗାଡ଼ି ନ ଆସି ଅଲଗା ଗାଡ଼ି ଆସିଲେ, ଯାତ୍ରୀ କୌଣସି କ୍ୟାନ୍ସଲେସନ୍ ଚାର୍ଜ ନ ଦେଇ ରାଇଡ୍ ରଦ୍ଦ କରିବାକୁ ଅନୁମତି ମିଳୁ।
-
ରାସ୍ତା ବଦଳିଲେ ଅଟୋମେଟିକ୍ ଆଲର୍ଟ: ଗାଡ଼ି ନିଜର ନିର୍ଦ୍ଧାରିତ ରାସ୍ତାରୁ ଅଲଗା ଆଡ଼କୁ ଗଲେ ଆପ୍ରେ ସ୍ୱୟଂଚାଳିତ ଆଲର୍ଟ ମିଳିବା କଥା ଏବଂ ପୋଲିସ ସହ ସିଧାସଳଖ ଲାଇଭ୍ ଲୋକେସନ ଶେୟାର କରିବା ପାଇଁ ୨୪x୭ କଣ୍ଟ୍ରୋଲ ରୁମ ରହିବା ଦରକାର।
-
ମହିଳା ଡ୍ରାଇଭରଙ୍କ ବିକଳ୍ପ: ଏକାକୀ ଯାତ୍ରା କରୁଥିବା ମହିଳାଙ୍କ ପାଇଁ ଯାଞ୍ଚ ହୋଇଥିବା ମହିଳା ଡ୍ରାଇଭରଙ୍କୁ ଚୟନ କରିବାର ସୁବିଧା ରହିବା ଆବଶ୍ୟକ।
-
ଆଚରଣଗତ ତାଲିମ: ଡ୍ରାଇଭରମାନଙ୍କୁ ନିୟମିତ ଭାବେ ଲିଙ୍ଗଗତ ସଂବେଦନଶୀଳତା (Gender-Sensitivity) ତାଲିମ ଦିଆଯାଉ ଏବଂ ଅଭିଯୋଗର ତୁରନ୍ତ ସମାଧାନ ପାଇଁ ଏକ ସ୍ୱତନ୍ତ୍ର ବ୍ୟବସ୍ଥା ହେଉ।
ଏହି ମାମଲାର ପରବର୍ତ୍ତୀ ଶୁଣାଣି ଆସନ୍ତା ଡିସେମ୍ବର ୧୬ ତାରିଖରେ ହେବ।
