ଦୁର୍ଗାପୂଜାରେ ଆମିଷ ବନାମ ନିରାମିଷ: ବାଗେଶ୍ୱର ବାବାଙ୍କ ବୟାନ ପରେ ବେଙ୍ଗଲ ରାଜନୀତି ଗରମ
ଦୁର୍ଗାପୂଜା ସମୟରେ ମଣ୍ଡପ ଆଖପାଖରେ ଆମିଷ ଖାଦ୍ୟ ବିକ୍ରି ଓ ଭକ୍ଷଣ ବନ୍ଦ କରିବାକୁ ବାଗେଶ୍ୱର ଧାମର ଧୀରେନ୍ଦ୍ର କୃଷ୍ଣ ଶାସ୍ତ୍ରୀ (ବାଗେଶ୍ୱର ବାବା) ଦେଇଥିବା ଆହ୍ୱାନକୁ ନେଇ ପଶ୍ଚିମବଙ୍ଗ ରାଜନୀତି ଓ ସାମାଜିକ ଗଣମାଧ୍ୟମରେ ବିବାଦ ତୀବ୍ର ହୋଇଛି।
ବେଙ୍ଗଲରେ ଶାକ୍ତ ପରମ୍ପରା ଅନୁସାରେ ଦୁର୍ଗାପୂଜା ଓ କାଳୀପୂଜାରେ ମାଂସ (ପାଠା ବଳି) ଏବଂ ମାଛ ଭୋଗ ଚଢ଼ାଯିବା ସହ ଆମିଷ ଖାଇବାର ପୁରୁଣା ସଂସ୍କୃତି ରହିଛି। ଏହି କାରଣରୁ ବାଗେଶ୍ୱର ବାବାଙ୍କ ବୟାନକୁ ବଙ୍ଗାଳୀ ସଂସ୍କୃତି ଉପରେ ବାହାର ନିୟମ ଲଦିବାର ପ୍ରଚେଷ୍ଟା ବୋଲି ଅନେକ ସ୍ଥାନୀୟ ଲୋକ ଓ ବିରୋଧୀ ଦଳ ସମାଲୋଚନା କରିଛନ୍ତି।
ଏହି ମାମଲାରେ ବିଜେପି ନେତା ସୁଭେନ୍ଦୁ ଅଧିକାରୀ ଏକ ନାଜୁକ ପରିସ୍ଥିତିର ସାମ୍ନା କରୁଛନ୍ତି। ଗୋଟିଏ ପଟେ କେନ୍ଦ୍ରୀୟ ହିନ୍ଦୁତ୍ୱ ନେତା ଓ ବାଗେଶ୍ୱର ବାବାଙ୍କୁ ସମର୍ଥନ କରିବା ଏବଂ ଅନ୍ୟପଟେ ବଙ୍ଗାଳୀ ଭୋଟରଙ୍କ ଆମିଷ ଖାଦ୍ୟ ପସନ୍ଦ ଓ ପରମ୍ପରାକୁ ସମ୍ମାନ ଦେବା ମଧ୍ୟରେ ତାଙ୍କୁ ସନ୍ତୁଳନ ରକ୍ଷା କରିବାକୁ ପଡ଼ୁଛି। ବିଜେପି ରାଜ୍ୟ ସଭାପତି ଶମୀକ ଭଟ୍ଟାଚାର୍ଯ୍ୟ ସ୍ପଷ୍ଟ କରିଛନ୍ତି ଯେ ବାଗେଶ୍ୱର ବାବାଙ୍କ ମନ୍ତବ୍ୟ ତାଙ୍କର ବ୍ୟକ୍ତିଗତ ମତ ଏବଂ ବଙ୍ଗାଳୀମାନେ ନିଜ ପରମ୍ପରା ଅନୁସାରେ ନବମୀରେ ମାଂସ ଖାଇବା ବଜାୟ ରଖିବେ।
