ପାଣ୍ଡରାରେ ହେବ ଅତ୍ୟାଧୁନିକ ମାଛ ବଜାର, ୟୁନିଟ୍-୪ ଭିଡ଼ରୁ ମିଳିବ ମୁକ୍ତି: ଅପରାଜିତା ଷଡ଼ଙ୍ଗୀ
ଭୁବନେଶ୍ୱର: ରାଜଧାନୀବାସୀଙ୍କ ପାଇଁ ଏକ ଖୁସି ଖବର। ଖୁବ୍ଶୀଘ୍ର ଭୁବନେଶ୍ୱରର ମାଛ ବଜାର ଅଞ୍ଚଳରୁ ଦୁର୍ଗନ୍ଧ ଓ ଯାତାୟାତ ସମସ୍ୟାର ସ୍ଥାୟୀ ସମାଧାନ ହେବାକୁ ଯାଉଛି। ୟୁନିଟ୍-୪ ମାଛ ବଜାରରେ ଦେଖାଯାଉଥିବା ଅତ୍ୟଧିକ ଭିଡ଼ ଓ ଟ୍ରାଫିକ୍ ସମସ୍ୟାକୁ ଏଡ଼ାଇବା ପାଇଁ ଉତ୍ତର ଭୁବନେଶ୍ୱରର ପାଣ୍ଡରାଠାରେ ନିର୍ମାଣ ଚାଲିଛି ଏକ ଅତ୍ୟାଧୁନିକ ହୋଲସେଲ୍ ମାଛ ବଜାର।
ରବିବାର ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ନିଜେ ପାଣ୍ଡରା ଗସ୍ତ କରି ନିର୍ମାଣାଧୀନ ବଜାର ପ୍ରକଳ୍ପର ଅଗ୍ରଗତି ସମୀକ୍ଷା କରିଛନ୍ତି।
ପ୍ରକଳ୍ପର ପ୍ରମୁଖ ବିବରଣୀ:
-
ଜମି ଓ ବ୍ୟୟ: ପ୍ରାୟ ୫.୪ ଏକର ମାମଲା-ମୁକ୍ତ (Litigation-free) ଜମିରେ ୫୧.୪୬ କୋଟି ଟଙ୍କା ବ୍ୟୟରେ ଏହି ପ୍ରକଳ୍ପ ନିର୍ମାଣ ହେଉଛି।
-
ସମୟସୀମା: ଆସନ୍ତା ୨୦୨୮ ମାର୍ଚ୍ଚ ୩୧ ସୁଦ୍ଧା ଏହାର କାର୍ଯ୍ୟ ସମ୍ପୂର୍ଣ୍ଣ କରିବାକୁ ଲକ୍ଷ୍ୟ ରଖାଯାଇଛି।
-
ସୁବିଧା: ଏଠାରେ ୪୦ଟି ହୋଲସେଲ କାଉଣ୍ଟର ସହିତ ୧୦୦ଟି ପିଣ୍ଡି ନିର୍ମାଣ କରାଯାଉଛି, ଯାହା ବ୍ୟବସାୟୀଙ୍କ ପାଇଁ ବେଶ୍ ସୁବିଧାଜନକ ହେବ।
ଗସ୍ତ ସମୟରେ ସାଂସଦଙ୍କ ସହ ଭୁବନେଶ୍ୱର-ଉତ୍ତରର ପୂର୍ବତନ ବିଧାୟକ ପ୍ରିୟଦର୍ଶୀ ମିଶ୍ର, ରୁଦ୍ର ନାରାୟଣ ସାମନ୍ତରାୟ, BMC ର ସିଟି ଇଞ୍ଜିନିୟର, ଡେପୁଟି କମିଶନର ଓ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ। ସମସ୍ତେ ସ୍ଥାନୀୟ ପାଣ୍ଡରା ଗ୍ରାମବାସୀଙ୍କ ସହ ଆଲୋଚନା କରିବା ସହ ନିର୍ଦ୍ଧାରିତ ସମୟ ମଧ୍ୟରେ କାମ ଶେଷ କରିବାକୁ ନିର୍ଦ୍ଦେଶ ଦେଇଛନ୍ତି।
ସାଂସଦ ଅପରାଜିତା ଷଡ଼ଙ୍ଗୀ ପ୍ରକାଶ କରିଛନ୍ତି ଯେ, ଏହା ତାଙ୍କର ଏକ ସ୍ୱପ୍ନର ପ୍ରକଳ୍ପ ଏବଂ ସେ ନିଜେ ଏହାର କାର୍ଯ୍ୟସୂଚୀକୁ ନିୟମିତ ତଦାରଖ କରିବେ। ଏହି ନୂତନ ବଜାର ନିର୍ମାଣ ହେବା ଦ୍ୱାରା ରାଜଧାନୀବାସୀଙ୍କୁ ଏକ ସୁସଂଗଠିତ, ସ୍ୱଚ୍ଛ ଓ ଆଧୁନିକ ପରିବେଶରେ ମାଛ କିଣିବାର ସୁବିଧା ମିଳିପାରିବ।
