ଭୋଟର ତାଲିକାରୁ ନାଁ କଟା ଅଭିଯୋଗ: ନିର୍ବାଚନ ଆୟୋଗ ଓ ଜ୍ଞାନେଶ କୁମାରଙ୍କୁ ସୁପ୍ରିମକୋର୍ଟଙ୍କ ନୋଟିସ୍
ନୂଆଦିଲ୍ଲୀ:
ନିର୍ବାଚନ ଆୟୋଗଙ୍କ ‘ସ୍ପେଶାଲ ଇଣ୍ଟେନସିଭ୍ ରିଭିଜନ୍’ (SIR) ପ୍ରକ୍ରିୟା ଏବଂ ଦେଶସାରା ଲକ୍ଷ ଲକ୍ଷ ଭୋଟରଙ୍କ ନାଁ କଟାଯିବା ଅଭିଯୋଗକୁ ନେଇ ଏବେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି ବିରୋଧୀ I ଏହି ମାମଲାରେ ସୁପ୍ରିମକୋର୍ଟ ନିର୍ବାଚନ ଆୟୋଗ (ECI), ମୁଖ୍ୟ ନିର୍ବାଚନ ଆୟୁକ୍ତ ଜ୍ଞାନେଶ କୁମାର ଏବଂ ଅନ୍ୟ ଦୁଇ ଆୟୁକ୍ତଙ୍କୁ ନୋଟିସ୍ ଜାରି କରି ଜବାବ ମାଗିଛନ୍ତି ।
ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧୀ ଏବଂ ‘ଇଣ୍ଡିଆ’ (INDIA) ମେଣ୍ଟର ପ୍ରମୁଖ ନେତାମାନେ ମିଳିତ ଭାବେ ଏହି ଆବେଦନ ଦାଖଲ କରିଥିଲେ । ପ୍ରଧାନ ବିଚାରପତି (CJI) ସୂର୍ଯ୍ୟ କାନ୍ତ ଏବଂ ଜଷ୍ଟିସ୍ ଜୟମାଲ୍ୟ ବାଗଚିଙ୍କୁ ନେଇ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରି ନୋଟିସ୍ ଜାରି କରିଛନ୍ତି ।
ଆବେଦନରେ ବିରୋଧୀ ଦଳଗୁଡ଼ିକର ମୁଖ୍ୟ ଦାବି:
-
ନିର୍ବାଚନ ଆୟୋଗ ଚଳାଇଥିବା SIR ପ୍ରକ୍ରିୟା ଉପରେ ତୁରନ୍ତ ସ୍ଥଗିତାଦେଶ (Stay) ଲଗାଯାଉ ।
-
ବିନା କୌଣସି ପୂର୍ବ ସୂଚନାରେ ଭୋଟର ତାଲିକାରୁ ଯେଉଁମାନଙ୍କ ନାଁ ହଟାଯାଇଛି, ସେମାନଙ୍କର ଏକ ସ୍ପଷ୍ଟ ଓ ବୁଥ୍-ୱାରୀ (Booth-wise) ତାଲିକା ସାର୍ବଜନୀନ କରାଯାଉ ।
-
ଜଣେ ଅବସରପ୍ରାପ୍ତ ସୁପ୍ରିମକୋର୍ଟ ବିଚାରପତିଙ୍କ ଅଧୀନରେ ଏକ ସ୍ୱାଧୀନ କମିଟି ଗଠନ କରି ଭୋଟର ନାଁ କଟାଯିବାର ତଦନ୍ତ କରାଯାଉ ।
ଅନ୍ୟପଟେ, ଶୁଣାଣି ସମୟରେ କୋର୍ଟ ଆବେଦନକାରୀଙ୍କ ପକ୍ଷରୁ ହୋଇଥିବା ପ୍ରତିବାଦ ମାର୍ଚ୍ଚ ଏବଂ ଆଚରଣକୁ ନେଇ ମଧ୍ୟ ଅସନ୍ତୋଷ ପ୍ରକାଶ କରିଛନ୍ତି ଏବଂ ଏ ନେଇ ପରବର୍ତ୍ତୀ ଶୁଣାଣିରେ ସ୍ପଷ୍ଟୀକରଣ ମାଗିଛନ୍ତି ।
