ବିଗ୍ ବସ୍ ୨୦ ଗୁଜବକୁ ନେଇ ଆଇନଗତ ନୋଟିସ୍ ପଠାଇଲେ ଲଳିତ ମୋଦୀ: କହିଲେ “ସମ୍ପୂର୍ଣ୍ଣ ମିଛ ଖବର”
ନୂଆଦିଲ୍ଲୀ:ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ)ର ପୂର୍ବତନ ଅଧ୍ୟକ୍ଷ ଲଳିତ ମୋଦୀ ପ୍ରସିଦ୍ଧ ରିଆଲିଟି ସୋ ‘ବିଗ୍ ବସ୍ ୨୦’ ରେ ଭାଗ ନେବା ନେଇ ଚାଲିଥିବା ଚର୍ଚ୍ଚାକୁ ସମ୍ପୂର୍ଣ୍ଣ କାଲପନିକ ଓ ଗୁଜବ ବୋଲି କହି ପ୍ରତ୍ୟାଖ୍ୟାନ କରିଛନ୍ତି। ଏହି ଖବରକୁ ସେ “ଫେକ୍ ନ୍ୟୁଜ୍” (Fake News) ବୋଲି କହିବା ସହ ଗଣମାଧ୍ୟମ ଏବଂ ସୋସିଆଲ ମିଡିଆ ପ୍ଲାଟଫର୍ମଗୁଡ଼ିକୁ ଆଇନଗତ ନୋଟିସ୍ ଜାରି କରିଛନ୍ତି।
ସୋସିଆଲ ମିଡିଆ ପ୍ଲାଟଫର୍ମ X (ପୂର୍ବର ଟ୍ୱିଟର) ଏବଂ ଇନଷ୍ଟାଗ୍ରାମରେ ନିଜର ଆଇନଗତ ନୋଟିସର କପି ସେୟାର କରି ଲଳିତ ମୋଦୀ ଲେଖିଛନ୍ତି:
“ଫେକ୍ ନ୍ୟୁଜ୍। ବସ। ମୋତେ ବିଗ୍ ବସ୍ ୨୦ ପାଇଁ କୌଣସି ଯୋଗାଯୋଗ କରାଯାଇ ନାହିଁ। ମୁଁ ବିଗ୍ ବସ୍ ୨୦ରେ ଭାଗ ନେଉନାହିଁ ଏବଂ ମୋର ଏଥିରେ ଅଂଶଗ୍ରହଣ କରିବାର କୌଣସି ଇଚ୍ଛା ମଧ୍ୟ ନାହିଁ। ଆଶ୍ଚର୍ଯ୍ୟର କଥା ଯେ, ସମ୍ପୃକ୍ତ ବ୍ୟକ୍ତିଙ୍କୁ ନପଚାରି କିପରି ଏକ ସମ୍ପୂର୍ଣ୍ଣ କାଲପନିକ କାହାଣୀ ‘ଖବର’ ପାଲଟିଯାଉଛି। ମୋର ଓକିଲମାନେ ନୋଟିସ୍ ଜାରି କରିଛନ୍ତି, ହୁଏତ ପରବର୍ତ୍ତୀ ସମୟରେ ପ୍ରକାଶ କରିବା ପୂର୍ବରୁ ସତ୍ୟତା ଯାଞ୍ଚ କରିବେ।”
ଗୁଜବ ଓ ‘ବିଗ୍ ବସ୍ ୨୦’ର ପ୍ରସ୍ତୁତି
ସଲମାନ୍ ଖାନ୍ଙ୍କ ସଞ୍ଚାଳନାରେ ସେପ୍ଟେମ୍ବର ୬ରୁ କଲର୍ସ ଟିଭି ଏବଂ ଜିଓ-ହଟଷ୍ଟାର୍ରେ ବିଗ୍ ବସ୍ Season ୨୦ ଆରମ୍ଭ ହେବାକୁ ଯାଉଛି। ସୋ’ ଆରମ୍ଭ ହେବା ପୂର୍ବରୁ ପ୍ରତିଯୋଗୀଙ୍କ ନାମକୁ ନେଇ ନାନା ଚର୍ଚ୍ଚା ଚାଲିଥିବା ବେଳେ ଲଳିତ ମୋଦୀଙ୍କ ଏହି କଠୋର ଆଇନଗତ ପଦକ୍ଷେପ ମିଥ୍ୟା ଗୁଜବ ଉପରେ ରୋକ୍ ଲଗାଇଛି।
