ଦୀପାବଳି ଭିଡିଓ ବିବାଦ: ବଲିଉଡ୍ ଅଭିନେତ୍ରୀ ଦିୟା ମିର୍ଜାଙ୍କୁ ‘ବ୍ଲାକଲିଷ୍ଟ’ କଲେ ମୁମ୍ବାଇ ମେୟର
ମୁମ୍ବାଇ: ଦୀପାବଳିରେ ପ୍ରଦୂଷଣମୁକ୍ତ ପରବ ପାଳନ କରିବା ପାଇଁ ମୁମ୍ବାଇ ମହାନଗର ନିଗମ (BMC) ପକ୍ଷରୁ ଏକ ସଚେତନତା ଭିଡିଓ ଜାରି କରାଯାଇଥିଲା। ଏଥିରେ ବଲିଉଡ୍ ଅଭିନେତ୍ରୀ ଦିୟା ମିର୍ଜା ଲୋକଙ୍କୁ ବାଣ ନଫୁଟାଇ ଶାନ୍ତିପୂର୍ଣ୍ଣ ଭାବେ ପର୍ବ ପାଳିବାକୁ ଅପିଲ୍ କରିଥିଲେ। ମାତ୍ର ଏହି ଭିଡିଓକୁ ନେଇ ଏବେ ଏକ ବଡ଼ ବିବାଦ ଛିଡ଼ା ହୋଇଛି।
ଭାଜପା ନେତାଙ୍କ ବିରୋଧ ପରେ ବିଏମସି ନିଜ ସୋସିଆଲ ମିଡିଆ ପୃଷ୍ଠାରୁ ଦିୟାଙ୍କ ଭିଡିଓଟିକୁ ହଟାଇ ଦେଇଛି। ଏହାପରେ ମୁମ୍ବାଇ ମେୟର ରିତୁ ତାୱଡେ ଦିୟା ମିର୍ଜାଙ୍କୁ ‘ହିନ୍ଦୁ ବିରୋଧୀ’ ବୋଲି କହିବା ସହ ତାଙ୍କୁ ଆଗାମୀ ଦିନରେ ବିଏମସିର କୌଣସି ବିଜ୍ଞାପନ ବା କାର୍ଯ୍ୟକ୍ରମରେ ସାମିଲ ନକରିବା ପାଇଁ ‘ବ୍ଲାକଲିଷ୍ଟ’ (କଳାତାଲିକାଭୁକ୍ତ) କରାଯାଇଛି ବୋଲି ସୂଚନା ଦେଇଛନ୍ତି।
ମେୟର କହିଛନ୍ତି ଯେ, ହିନ୍ଦୁମାନେ କିପରି ପର୍ବ ପାଳନ କରିବେ, ସେଥିପାଇଁ କୌଣସି ଅଭିନେତ୍ରୀଙ୍କଠାରୁ ଶିଖିବାର ଦରକାର ନାହିଁ। ଦିୟା ମିର୍ଜା ଅତୀତରେ ମଧ୍ୟ ସରକାରଙ୍କ ଅନେକ ନୀତିକୁ ବିରୋଧ କରିଛନ୍ତି।
ଅପରପକ୍ଷରେ, ଏହି ଘଟଣାରେ ଦିୟା ମିର୍ଜା ନିଜର ପ୍ରତିକ୍ରିୟା ରଖି କହିଛନ୍ତି ଯେ, ସେ ପ୍ରଦୂଷଣ ରୋକିବା ଓ ପରିବେଶ ସୁରକ୍ଷା ପାଇଁ ବିନା କୌଣସି ପାରିଶ୍ରମିକରେ (ମାଗଣାରେ) ଏହି ଭିଡିଓଟି ବନାଇଥିଲେ। ସାଧାରଣ ଲୋକଙ୍କ ଭଲ ପାଇଁ କାମ କଲେ ବି ଆଜିକାଲି ଏମିତି ବିରୋଧର ସାମ୍ନା କରିବାକୁ ପଡ଼ୁଛି ବୋଲି ସେ ଦୁଃଖ ପ୍ରକାଶ କରିଛନ୍ତି। ଏହି ମାମଲାକୁ ନେଇ ଏବେ ମୁମ୍ବାଇ ରାଜନୀତି ଗରମ ରହିଛି।
