ଶ୍ରୀରାମ ଜନ୍ମଭୂମି ତୀର୍ଥକ୍ଷେତ୍ର ଟ୍ରଷ୍ଟର ପ୍ରଥମ CEO ଭାବେ ନିଯୁକ୍ତ ହେଲେ ଏୟାର ମାର୍ଶାଲ ଜିତେନ୍ଦ୍ର ମିଶ୍ର
ଅଯୋଧ୍ୟା: ଶ୍ରୀରାମ ଜନ୍ମଭୂମି ତୀର୍ଥକ୍ଷେତ୍ର ଟ୍ରଷ୍ଟକୁ ମିଳିଛନ୍ତି ପ୍ରଥମ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (CEO)। ଭାରତୀୟ ବାୟୁସେନାର ଅବସରପ୍ରାପ୍ତ ଏୟାର ମାର୍ଶାଲ ଜିତେନ୍ଦ୍ର ମିଶ୍ରଙ୍କୁ ଏହି ଦାୟିତ୍ୱ ଦିଆଯାଇଛି। ଟ୍ରଷ୍ଟର ପ୍ରଶାସନିକ ବ୍ୟବସ୍ଥାକୁ ଆହୁରି ସୁଦୃଢ଼ ଓ ପାରଦର୍ଶୀ କରିବା ପାଇଁ ଏକ ସ୍ୱତନ୍ତ୍ର ସର୍ଚ୍ଚ କମିଟିର ସୁପାରିଶ କ୍ରମେ ତାଙ୍କୁ ଚୟନ କରାଯାଇଛି।
ଜିତେନ୍ଦ୍ର ମିଶ୍ର ଭାରତୀୟ ବାୟୁସେନାରେ ଦୀର୍ଘ ୩୮ ବର୍ଷ ଧରି ସେବା ଯୋଗାଇଛନ୍ତି। ସେ ୱେଷ୍ଟର୍ଣ୍ଣ ଏୟାର କମାଣ୍ଡର ଏୟାର ଅଫିସର କମାଣ୍ଡିଂ-ଇନ୍-ଚିଫ୍ (AOC-in-C) ଏବଂ ଇଣ୍ଟିଗ୍ରେଟେଡ୍ ଡିଫେନ୍ସ ଷ୍ଟାଫର ଡେପୁଟି ଚିଫ୍ ଭାବରେ କାର୍ଯ୍ୟ କରିସାରିଛନ୍ତି। କାରଗିଲ ଯୁଦ୍ଧ (ଅପରେସନ୍ ସଫେଦ ସାଗର) ସମୟରେ ମିରାଜ ୨୦୦୦ ବିମାନରେ ଲେଜର ଗାଇଡେଡ୍ ମୁନିସନ ସାମିଲ କରିବାରେ ଏବଂ ଅପରେସନ୍ ସିନ୍ଦୂରରେ ନେତୃତ୍ୱ ନେବାରେ ତାଙ୍କର ଗୁରୁତ୍ୱପୂର୍ଣ୍ଣ ଭୂମିକା ଥିଲା। ସେ ସର୍ବୋତ୍ତମ ଯୁଦ୍ଧ ସେବା ମେଡାଲ (SYSM), AVSM ଓ VSM ସମ୍ମାନରେ ସମ୍ମାନିତ।
ଟ୍ରଷ୍ଟର CEO ଭାବେ ସେ ଅଯୋଧ୍ୟା ରାମ ମନ୍ଦିରର ଦୈନନ୍ଦିନ ପରିଚାଳନା, ଶ୍ରଦ୍ଧାଳୁଙ୍କ ସୁବିଧା ସୁଯୋଗ, ସୁରକ୍ଷା ବ୍ୟବସ୍ଥା ଏବଂ ଆର୍ଥିକ କାରବାରର ତଦାରଖ କରିବେ। ତାଙ୍କର ବହୁ ବର୍ଷର ନେତୃତ୍ୱ ଓ ପରିଚାଳନା ଦକ୍ଷତା ଟ୍ରଷ୍ଟର କାର୍ଯ୍ୟକୁ ଆହୁରି ବ୍ୟବସ୍ଥିତ କରିବାରେ ସାହାଯ୍ୟ କରିବ।
