ଭୋଟ ଦେବାର ଅଧିକାର ଛଡ଼ାଇ ନେବା ଅସାମ୍ବିଧାନିକ: ସୁପ୍ରିମକୋର୍ଟ ବିଚାରପତି ଜଷ୍ଟିସ ଉଜ୍ଜଲ ଭୁୟାଁଙ୍କ ବଡ଼ ବୟାନ
ନୂଆଦିଲ୍ଲୀ / ହାଇଦ୍ରାବାଦ:
ନାଗରିକଙ୍କ ଭୋଟ ଦେବାର ଅଧିକାରକୁ ନେଇ ସୁପ୍ରିମକୋର୍ଟଙ୍କ ବରିଷ୍ଠ ବିଚାରପତି ଜଷ୍ଟିସ ଉଜ୍ଜଲ ଭୁୟାଁ ଏକ ଗୁରୁତ୍ୱପୂର୍ଣ୍ଣ ଓ ବଡ଼ ବୟାନ ଦେଇଛନ୍ତି। ହାଇଦ୍ରାବାଦସ୍ଥିତ NALSAR ଆଇନ ବିଶ୍ୱବିଦ୍ୟାଳୟର ଏକ କାର୍ଯ୍ୟକ୍ରମରେ ସମ୍ବୋଧିତ କରି ସେ କହିଛନ୍ତି ଯେ, ଲକ୍ଷ ଲକ୍ଷ ନାଗରିକଙ୍କୁ ଭୋଟ ଅଧିକାରରୁ ବଞ୍ଚିତ କରିବା କିମ୍ବା ଭୋଟର ତାଲିକାରୁ ମନମୁଖୀ ଭାବେ ନାମ ହଟାଇବା ସମ୍ପୂର୍ଣ୍ଣ ଅସାମ୍ବିଧାନିକ ଏବଂ ବେଆଇନ।
ଜଷ୍ଟିସ ଭୁୟାଁ ସ୍ପଷ୍ଟ ଭାବେ କହିଛନ୍ତି ଯେ ଭାରତୀୟ ସମ୍ବିଧାନରେ ଦୁଇ ପ୍ରକାରର ନାଗରିକଙ୍କ ପାଇଁ କୌଣସି ସ୍ଥାନ ନାହିଁ—ଗୋଟିଏ ଭୋଟ ଅଧିକାର ଥିବା ନାଗରିକ ଓ ଅନ୍ୟଟି ଭୋଟ ଅଧିକାର ନଥିବା ନାଗରିକ। କୌଣସି ବି ପ୍ରଶାସନିକ ପ୍ରକ୍ରିୟା ବା ନିଷ୍ପତ୍ତି ଯଦି ସାଧାରଣ ନାଗରିକଙ୍କୁ ଭୋଟ ଅଧିକାରରୁ ବଞ୍ଚିତ କରେ, ତେବେ ତାହା ସମ୍ବିଧାନର ଧାରା 14 (ସମାନତା ଅଧିକାର) ଏବଂ ଧାରା 326 (ସାର୍ବଜନୀନ ବୟସ୍କ ମତାଧିକାର) ର ସିଧାସଳଖ ଉଲ୍ଲଂଘନ କରେ।
ସେ ଆହୁରି ମଧ୍ୟ କହିଛନ୍ତି ଯେ, ମୃତ ବ୍ୟକ୍ତିଙ୍କୁ ଛାଡ଼ି ଅନ୍ୟ କୌଣସି ଭୋଟରଙ୍କ ନାମ ବିନା ନୋଟିସ ଓ ଶୁଣାଣିରେ ତାଲିକାରୁ ହଟାଯାଇପାରିବ ନାହିଁ। କୌଣସି ବି ଯୁକ୍ତି ବା ବାହାନା ଦେଇ ଏଭଳି କାର୍ଯ୍ୟକୁ ସଠିକ ବୋଲି ଦର୍ଶାଯାଇପାରିବ ନାହିଁ। ସମ୍ବିଧାନର ମୂଳ ଢାଞ୍ଚାରେ ଭୋଟ ଦେବାର ଅଧିକାର ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ସମ୍ବିଧାନ ଉପରେ କୌଣସି କର୍ତ୍ତୃପକ୍ଷ ବା ଅନୁଷ୍ଠାନ ନାହାଁନ୍ତି।
