ଏନ୍ଆଇସି ଓଡ଼ିଶାରେ ‘ହିନ୍ଦୀ ପକ୍ଷ-୨୦୨୬’ ସମାପନ
ଭୁବନେଶ୍ୱର:
ସରକାରୀ କାମକାର୍ଯ୍ୟରେ ହିନ୍ଦୀ ଭାଷାର ବ୍ୟବହାରକୁ ପ୍ରୋତ୍ସାହିତ କରିବା ଉଦ୍ଦେଶ୍ୟରେ ଏନ୍ଆଇସି (NIC) ଓଡ଼ିଶା ପକ୍ଷରୁ ଗତ ସେପ୍ଟେମ୍ବର ୧୪ରୁ ୨୮ ତାରିଖ ପର୍ଯ୍ୟନ୍ତ ଆୟୋଜିତ ‘ହିନ୍ଦୀ ପକ୍ଷ-୨୦୨୬’ ଉତ୍ସାହର ସହ ସମ୍ପନ୍ନ ହୋଇଯାଇଛି।
ଏହି ଦୁଇ ସପ୍ତାହବ୍ୟାପୀ କାର୍ଯ୍ୟକ୍ରମରେ ଅଫିସର ଅଧିକାରୀ ଓ କର୍ମଚାରୀମାନଙ୍କ ମଧ୍ୟରେ ଟାଇପିଂ, ଅନୁବାଦ, ସୃଜନଶୀଳ ଲେଖନ, କବିତା ଆବୃତ୍ତି ଏବଂ ବକ୍ତୃତା ଭଳି ବିଭିନ୍ନ ପ୍ରତିଯୋଗିତା ଅନୁଷ୍ଠିତ ହୋଇଥିଲା। ଏହାସହିତ ଅଂଶଗ୍ରହଣକାରୀମାନେ ନାଟିକା, ସଙ୍ଗୀତ ଓ ହାସ୍ୟରସାତ୍ମକ କାର୍ଯ୍ୟକ୍ରମ ପରିବେଷଣ କରି ସମସ୍ତଙ୍କ ମନ କିଣିନେଇଥିଲେ।
ଉଦ୍ଘାଟନୀ ସମାରୋହରେ ଇଣ୍ଡିଆନ୍ ଓଭରସିଜ୍ ବ୍ୟାଙ୍କର ରାଜଭାଷା ଅଧିକାରୀ ରାଜୀବ ରଞ୍ଜନ ଏବଂ ଉଦ୍ଯାପନୀ ଉତ୍ସବରେ ପିଏମ୍ ଶ୍ରୀ କେନ୍ଦ୍ରୀୟ ବିଦ୍ୟାଳୟ ନମ୍ବର-୪ର ଅଧ୍ୟକ୍ଷ ଧୀରେନ୍ଦ୍ର କୁମାର ଝା ଅତିଥି ଭାବେ ଯୋଗଦେଇଥିଲେ। ଏହି ଅବସରରେ ଏନ୍ଆଇସିର ନିୟମିତ ନ୍ୟୁଜ୍ଲେଟର ‘ଦ ଏସେଣ୍ଡର’ର ହିନ୍ଦୀ ସଂସ୍କରଣ ମଧ୍ୟ ଉନ୍ମୋଚିତ ହୋଇଥିଲା।
ଏନ୍ଆଇସିର ରାଜ୍ୟ ଉପମହାନିର୍ଦ୍ଦେଶକ ତଥା ରାଜ୍ୟ ସୂଚନା ବିଜ୍ଞାନ ପଦାଧିକାରୀ ଡ. ଅଶୋକ କୁମାର ହୋତାଙ୍କ ମାର୍ଗଦର୍ଶନରେ ଆୟୋଜିତ ଏହି କାର୍ଯ୍ୟକ୍ରମକୁ ବରିଷ୍ଠ ନିର୍ଦ୍ଦେଶକ ଶିୱାନୀ କୋରାହ ଓ ହିନ୍ଦୀ ଅନୁବାଦିକା ଡ. ଅଳକା ପ୍ରଧାନ ପରିଚାଳନା କରିଥିଲେ। ଶେଷରେ ପ୍ରତିଯୋଗିତାର କୃତୀ ପ୍ରତିଯୋଗୀମାନଙ୍କୁ ପୁରସ୍କୃତ କରାଯାଇଥିଲା।
