Odisha DGP Selection Row: Amicus Raju Ramachandran Clashes with State AG in Supreme Court/ଓଡ଼ିଶା DGP ନିଯୁକ୍ତି ବିବାଦ: ଅଦାଲତରେ ଆମିକସ କ୍ୟୁରି ଓ ରାଜ୍ୟ AGଙ୍କ ମଧ୍ୟରେ ତୀବ୍ର ଯୁକ୍ତିତର୍କ…

ଓଡ଼ିଶାର ନୂଆ ଡିଜିପି (DGP) ନିଯୁକ୍ତିକୁ ନେଇ ସୁପ୍ରିମକୋର୍ଟରେ ବିବାଦ ଉଗ୍ର ରୂପ ନେଇଛି। ଗୋଟିଏ ପଟେ ନିଯୁକ୍ତି ପ୍ରକ୍ରିୟାରେ ଅନିୟମିତତା ନେଇ ରାଜ୍ୟ ସରକାରଙ୍କୁ କୋର୍ଟ କଠୋର ପ୍ରଶ୍ନବାଣ ମାରିଥିବା ବେଳେ, ଅନ୍ୟପଟେ ଶୁଣାଣି ବେଳେ ରାଜ୍ୟ ଆଡଭୋକେଟ ଜେନେରାଲ (AG) ଏବଂ କୋର୍ଟଙ୍କ ଦ୍ୱାରା ନିଯୁକ୍ତ ଆମିକସ କ୍ୟୁରିଙ୍କ ମଧ୍ୟରେ ଜବରଦସ୍ତ ଯୁକ୍ତିତର୍କ ଦେଖିବାକୁ ମିଳିଛି।

ମାମଲାର ଶୁଣାଣି ସମୟରେ ଓଡ଼ିଶା ସରକାରଙ୍କ ପକ୍ଷ ରଖୁଥିବା ଆଡଭୋକେଟ ଜେନେରାଲ ପୀତାମ୍ବର ଆଚାର୍ଯ୍ୟ କହିଥିଲେ ଯେ, ଆମିକସ କ୍ୟୁରି (Amicus Curiae) ରାଜୁ ରାମଚନ୍ଦ୍ରନ ସରକାରଙ୍କ ତଥ୍ୟ ନଦେଖି ଆବେଦନକାରୀଙ୍କ ଓକିଲ ଭାବେ କାମ କରୁଛନ୍ତି। ଏହାକୁ ନେଇ କ୍ଷୁବ୍ଧ ହୋଇ ରାମଚନ୍ଦ୍ରନ କହିଥିଲେ— “ମୋର ୫୦ ବର୍ଷର ଆଇନଜୀବୀ କ୍ୟାରିୟରରେ ମୋ ନିରପେକ୍ଷତା ଉପରେ କେହି କେବେ ପ୍ରଶ୍ନ ଉଠାଇ ନାହାନ୍ତି। ଯଦି ଏପରି ଅଭିଯୋଗ ରହେ, ତେବେ ମୋତେ ମାମଲାରୁ ଓହରିଯିବାକୁ ଅନୁମତି ଦିଆଯାଉ।” ଏହାପରେ ପ୍ରଧାନ ବିଚାରପତି (CJI) ସୂର୍ଯ୍ୟକାନ୍ତ ଏଥିରେ ହସ୍ତକ୍ଷେପ କରି ମାମଲାକୁ ଶାନ୍ତ କରିବା ସହ ଆମିକସଙ୍କ ଉପରେ ନିଜର ଆସ୍ଥା ପ୍ରକଟ କରିଥିଲେ।

ବରିଷ୍ଠ ଆଇନଜୀବୀ ପି. ଚିଦାମ୍ବରମ୍‌ ଓ ପ୍ରଶାନ୍ତ ଭୂଷଣ କୋର୍ଟଙ୍କୁ ଜଣାଇଥିଲେ ଯେ, ସୁପ୍ରିମକୋର୍ଟଙ୍କ ୨୦୦୬ର ପ୍ରକାଶ ସିଂ ନିର୍ଦ୍ଦେଶାବଳୀକୁ ଏଡ଼ାଇବା ପାଇଁ ରାଜ୍ୟ ସରକାର ମାତ୍ର ୪୮ ଘଣ୍ଟା ମଧ୍ୟରେ ଅସ୍ଥାୟୀ (ex-cadre) ପଦବୀ ସୃଷ୍ଟି କରି ନିଜ ପସନ୍ଦର କନିଷ୍ଠ ଅଫିସରଙ୍କୁ ସୁଯୋଗ ଦେବାକୁ ଚେଷ୍ଟା କରିଛନ୍ତି। ପ୍ରଥମେ sent ହୋଇଥିବା ୩ ଜଣିଆ ବରିଷ୍ଠ ଅଫିସରଙ୍କ ତାଲିକାକୁ ବଦଳାଇ ୧୧ ଜଣିଆ ନୂଆ ତାଲିକା ପଠାଯାଇଥିଲା।

୧୯୯୩ ବ୍ୟାଚ୍‌ର ବରିଷ୍ଠ IPS ଅଫିସର ସୁଶାନ୍ତ କୁମାର ନାଥଙ୍କ ନାଁ ପ୍ରଥମେ UPSC କୁ ପଠାଯାଇଥିଲା, ମାତ୍ର ପରେ ତାଙ୍କର Integrity Certificate ଅଟକାଇ ଦିଆଗଲା। CBI FIR ର ବାହାନା ନେଇ ରାଜ୍ୟ ସରକାର ଏହା କରିଥିବା ବେଳେ କୋର୍ଟ ପ୍ରଶ୍ନ କରିଛନ୍ତି ଯେ— ଯଦି FIR ବିଷୟରେ ଆଗରୁ ଜଣାଥିଲା, ତେବେ ମେ ମାସରେ ତାଙ୍କ ନାଁ UPSC କୁ କାହିଁକି ପଠାଯାଇଥିଲା? କୌଣସି ଅଫିସର ନିଲମ୍ବିତ ନହେବା କିମ୍ବା ତାଙ୍କ ନାଁରେ ଚାର୍ଜସିଟ୍‌ ନହେବା ଯାଏଁ ସତ୍ୟନିଷ୍ଠା ପ୍ରମାଣପତ୍ର ଅଟକାଯାଇପାରିବ ନାହିଁ ବୋଲି ଆମିକସ ଓ ଆବେଦନକାରୀ ଯୁକ୍ତି ରଖିଛନ୍ତି।

ସୁପ୍ରିମକୋର୍ଟ ଏହି ଗୁରୁତର ଅଭିଯୋଗଗୁଡ଼ିକ ଉପରେ ଓଡ଼ିଶା ସରକାରଙ୍କୁ ସପଥପତ୍ର (Affidavit) ଜରିଆରେ ଜବାବ ଦେବାକୁ କହିଛନ୍ତି। କୋର୍ଟଙ୍କ ଆଦେଶ ନଆସିବା ପର୍ଯ୍ୟନ୍ତ UPSC କୁ DGP ଚୟନ ଚୂଡ଼ାନ୍ତ ନକରିବାକୁ ନିର୍ଦ୍ଦେଶ ରହିଛି।