ଚୀନ୍ର ବାଧ୍ୟତାମୂଳକ ସାଂସ୍କୃତିକ ବିଲୋପ ନୀତି ବିରୋଧରେ ଆଞ୍ଚଳିକ ତିବ୍ଦତୀୟ ମହିଳା ସଂଘର ବିଗୁଲ୍
ଭୁବନେଶ୍ୱର: ଆଜି ଭୁବନେଶ୍ୱର ମାଷ୍ଟରକ୍ୟାଣ୍ଟିନ ଠାରେ ଚୀନ୍ ସରକାରଙ୍କ ଦ୍ୱାରା ନିକଟରେ ଲାଗୁ କରାଯାଇଥିବା ବିବାଦୀୟ “ଜାତୀୟ ଏକତା ଏବଂ ପ୍ରଗତି ନିୟମାବଳୀ” (Ethnic Unity and Progress Law) ଏବଂ ତିବ୍ଦତୀୟ ଦେଶପ୍ରେମୀ ରଂଜେନ୍ ଲୋବଗାଙ୍କ ଆତ୍ମାହୁତିକୁ ନେଇ ଓଡ଼ିଶା ଆଞ୍ଚଳିକ ତିବ୍ଦତୀୟ ମହିଳା ସଂଘ (Regional Tibetan Women’s Association of Odisha) ଦୃଢ଼ ପ୍ରତିକ୍ରିୟା ପ୍ରକାଶ କରିଛି।
ଚୀନ୍ ସରକାର ଜୁଲାଇ ୧, ୨୦୨୬ ରୁ ୬୫ଟି ଧାରା ବିଶିଷ୍ଟ “ଜାତୀୟ ଏକତା” ଆଇନ କାର୍ଯ୍ୟକାରୀ କରିଛନ୍ତି।
ଏହି ଆଇନ ମାଧ୍ୟମରେ ତିବ୍ଦତୀୟଙ୍କ ଭାଷା, ଧର୍ମ, ସଂସ୍କୃତି, ଇତିହାସ ଓ ପରମ୍ପରାକୁ ବଳପୂର୍ବକ ହଟାଇ ଏକକ ଚୀନ୍ ପରିଚୟରେ ମିଶାଇବାକୁ ଚେଷ୍ଟା କରାଯାଉଥିବା ଅଭିଯୋଗ ହୋଇଛି।
ରଂଜେନ୍ ଲୋବଗାଙ୍କ ବଳିଦାନ
ଜୁଲାଇ ୨, ୨୦୨୬ରେ ତିବ୍ଦତୀୟ ଆନ୍ଦୋଳନକାରୀ ରଂଜେନ୍ ଲୋବଗା ନ୍ୟୁୟର୍କସ୍ଥିତ ଜାତିସଂଘ (UN) ମୁଖ୍ୟାଳୟ ସାମ୍ନାରେ ଆତ୍ମାହୁତି ଦେଇଛନ୍ତି।ନିଜର ଶେଷ ସନ୍ଦେଶରେ ସେ କହିଥିଲେ ଯେ, ଚୀନ୍ର ଦମନକାରୀ ନୀତିରୁ ତିବ୍ଦତର ଅସ୍ତିତ୍ୱ ରକ୍ଷା ପାଇଁ ସମସ୍ତ ତିବ୍ଦତୀୟ ବ୍ୟକ୍ତିଗତ ଓ ଆଞ୍ଚଳିକ ମତଭେଦ ଭୁଲି ଏକଜୁଟ ହେବା ଆବଶ୍ୟକ।
ଓଡ଼ିଶା ଆଞ୍ଚଳିକ ତିବ୍ଦତୀୟ ମହିଳା ସଂଘର ମୁଖ୍ୟ ୫ଟି ଦାବି:
1.’ଜାତୀୟ ଏକତା’ ଆଇନର ରଦ୍ଦ:ତିବ୍ଦତୀୟଙ୍କ ସଂସ୍କୃତି ନଷ୍ଟ କରୁଥିବା ଏହି ଆଇନକୁ ତୁରନ୍ତ ପ୍ରତ୍ୟାହାର କରାଯାଉ।
2. ଚୀନ୍ ସରକାରଙ୍କ ଉତ୍ତରଦାୟିତ୍ୱ:ତିବ୍ଦତୀୟମାନଙ୍କୁ ଆତ୍ମାହୁତି ପରି ଚରମ ପଦକ୍ଷେପ ନେବାକୁ ବାଧ୍ୟ କରୁଥିବା ନୀତି ପାଇଁ ଚୀନ୍କୁ ଦାୟୀ କରାଯାଉ।
3. ଜାତିସଂଘର ହସ୍ତକ୍ଷେପ: ଜାତିସଂଘ ମୁଖ୍ୟାଳୟ ସାମ୍ନାରେ ହୋଇଥିବା ଏହି ବଳିଦାନକୁ ଗାମ୍ଭୀର୍ଯ୍ୟର ସହ ନେଇ ତିବ୍ଦତର ମାନବାଧିକାର ସ୍ଥିତି ଉପରେ କଠୋର ପଦକ୍ଷେପ ନିଆଯାଉ।
4. ଆନ୍ତର୍ଜାତୀୟ ନଜର: ଚୀନ୍ ସରକାରଙ୍କ ଦମନକାରୀ ନୀତି ଉପରେ ବିଶ୍ୱ ସମୁଦାୟ ଓ ମାନବାଧିକାର ସଂଗଠନଗୁଡ଼ିକ କଡ଼ା ନଜର ରଖନ୍ତୁ।
5. ଆତ୍ମନିର୍ଣ୍ଣୟ ଅଧିକାର: ତିବ୍ଦତୀୟ ଜନସାଧାରଣଙ୍କ ସ୍ୱାଧୀନତା ଓ ନିଜର ଭବିଷ୍ୟତ ନିଜେ ନିର୍ଦ୍ଧାରଣ କରିବାର ଅଧିକାରକୁ ଆନ୍ତର୍ଜାତୀୟ ସ୍ୱୀକୃତି ପ୍ରଦାନ କରାଯାଉ।
