ମନ୍ତ୍ରୀମାନଙ୍କୁ ପ୍ରଧାନମନ୍ତ୍ରୀ ମୋଦୀଙ୍କ ସୋସିଆଲ ମିଡିଆ ‘ରିପୋର୍ଟ କାର୍ଡ’: ‘ଜେନ୍-ଜି’ ଏବଂ ଯୁବବର୍ଗଙ୍କ ପାଖରେ ପହଞ୍ଚିବାକୁ ନିର୍ଦ୍ଦେଶ
ନୂଆଦିଲ୍ଲୀ:
ସୋସିଆଲ ମିଡିଆରେ ନିଜର ଉପସ୍ଥିତି ଏବଂ ସକ୍ରିୟତାକୁ ଆହୁରି ବଢ଼ାଇବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଜ କ୍ୟାବିନେଟ ମନ୍ତ୍ରୀମାନଙ୍କୁ କଡ଼ା ନିର୍ଦ୍ଦେଶ ଦେଇଛନ୍ତି। କେବଳ ସରକାରୀ ଯୋଜନାର ପ୍ରଚାର ନକରି ଯୁବପିଢ଼ି, ବିଶେଷ କରି ‘ଜେନ୍-ଜି’ (Gen Z) ଏବଂ ‘ଜେନ୍-ଆଲଫା’ (Gen Alpha) ବର୍ଗଙ୍କ ସହ ସିଧାସଳଖ ଯୋଗାଯୋଗ ପ୍ରତିଷ୍ଠା କରିବାକୁ ସେ ଗୁରୁତ୍ୱ ଦେଇଛନ୍ତି।
ନିକଟରେ ଅନୁଷ୍ଠିତ କ୍ୟାବିନେଟ ବୈଠକରେ ସମସ୍ତ ମନ୍ତ୍ରୀଙ୍କ ସୋସିଆଲ ମିଡିଆ ପ୍ରଦର୍ଶନର ଏକ ‘ରିପୋର୍ଟ କାର୍ଡ’ ରଖାଯାଇଥିଲା। ମେ ១ ରୁ ଅଗଷ୍ଟ ១୫ ମଧ୍ୟରେ ଇନଷ୍ଟାଗ୍ରାମ, ଏକ୍ସ (ଟ୍ୱିଟର), ଫେସବୁକ ଏବଂ ଲିଙ୍କଡଇନ୍ ପରି ପ୍ଲାଟଫର୍ମଗୁଡ଼ିକରେ ମନ୍ତ୍ରୀମାନଙ୍କର ପୋଷ୍ଟ, ଲୋକଙ୍କ ପ୍ରତିକ୍ରିୟା ଏବଂ ନିୟମିତତାକୁ ଆଧାର କରି ଏହି ରିପୋର୍ଟ ପ୍ରସ୍ତୁତ କରାଯାଇଥିଲା। ଏହି ତାଲିକାରେ ପ୍ରଧାନମନ୍ତ୍ରୀ ମୋଦୀ ନିଜେ ଶୀର୍ଷରେ ରହିଥିବା ବେଳେ ଗୃହମନ୍ତ୍ରୀ ଅମିତ ଶାହ, ନିତିନ ଗଡ଼କରୀ, ରାଜନାଥ ସିଂହ, ଶିବରାଜ ସିଂହ ଚୌହାନ, ଆଶ୍ୱିନୀ ବୈଷ୍ଣବ, ପୀୟୂଷ ଗୋୟଲ ଏବଂ ସି.ଆର. ପାଟିଲ ପ୍ରମୁଖ ଭଲ ପ୍ରଦର୍ଶନ କରିଛନ୍ତି।
ବୈଠକରେ ପ୍ରଧାନମନ୍ତ୍ରୀ ସ୍ପଷ୍ଟ କରିଛନ୍ତି ଯେ, କେବଳ ସରକାରୀ ନିଷ୍ପତ୍ତିକୁ ପୋଷ୍ଟ କିମ୍ବା ରି-ପୋଷ୍ଟ କରିଦେଲେ ହେବନାହିଁ, ବରଂ ସରଳ ଏବଂ ଆକର୍ଷଣୀୟ ଢଙ୍ଗରେ ଲୋକଙ୍କ ସହ ଆଲୋଚନା କରିବାକୁ ହେବ।
ଏହାସହ ଯୁବବର୍ଗଙ୍କ ସହ ସମ୍ପର୍କ ମଜବୁତ କରିବା ପାଇଁ ପ୍ରତିଦିନ ଜଣେ ଜଣେ କେନ୍ଦ୍ରମନ୍ତ୍ରୀ ଗୋଟିଏ ଲେଖାଏଁ ବିଶ୍ୱବିଦ୍ୟାଳୟ ପରିଦର୍ଶନ କରି ଛାତ୍ରଛାତ୍ରୀଙ୍କ ସହ କଥା ହେବାକୁ ନିଷ୍ପତ୍ତି ନିଆଯାଇଛି। ସେହିପରି ମନ୍ତ୍ରୀମାନଙ୍କୁ ନିଜ ନିଜ ନିର୍ବାଚନ ମଣ୍ଡଳୀର ସରକାରୀ ସ୍କୁଲଗୁଡ଼ିକୁ ଯାଇ ଭିତ୍ତିଭୂମି ଏବଂ ମଧ୍ୟାହ୍ନ ଭୋଜନର ସମୀକ୍ଷା କରିବାକୁ ମଧ୍ୟ କୁହାଯାଇଛି।
