ପାକିସ୍ତାନକୁ ୫-୩ ରେ ହରାଇଲା ଭାରତ, ହକି ବିଶ୍ୱକପ୍ ସେମିଫାଇନାଲ୍ ରେସ୍ରେ କାଏମ୍
ଆମଷ୍ଟେଲଭିନ୍ (ନେଦରଲ୍ୟାଣ୍ଡସ): ଏଫ୍ଆଇଏଚ୍ ପୁରୁଷ ହକି ବିଶ୍ୱକପ୍ ୨୦୨୬ରେ ଭାରତୀୟ ଦଳର ଦମଦାର ପ୍ରଦର୍ଶନ ଜାରି ରହିଛି। ବୁଧବାର ନେଦରଲ୍ୟାଣ୍ଡସର ଆମଷ୍ଟେଲଭିନ୍ଠାରେ ଖେଳାଯାଇଥିବା ହାଇ-ଭୋଲ୍ଟେଜ୍ ମ୍ୟାଚ୍ରେ ଭାରତୀୟ ଦଳ ନିଜର ଚିରପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ୫-୩ ଗୋଲ୍ରେ ପରାସ୍ତ କରିଛି। ଏହି ବିଜୟ ସହ ଭାରତ ପୁଲ୍-ଡି (Pool D) ର ଦ୍ୱିତୀୟ ସ୍ଥାନରେ ରହି ନେକ୍ସଟ୍ ରାଉଣ୍ଡ ବା ସେମିଫାଇନାଲ୍ ଦୌଡ଼ରେ ନିଜ ସ୍ଥାନ ପକ୍କା କରିଛି। ଅନ୍ୟପଟେ ଏହି ପରାଜୟ ସହ ପାକିସ୍ତାନ ଦଳ ବିଶ୍ୱକପ୍ର ମୁଖ୍ୟ ରେସ୍ରୁ ବାଦ୍ ପଡ଼ି କ୍ଲାସିଫିକେସନ୍ ଚରଣକୁ ଖସିଯାଇଛି।
ମ୍ୟାଚ୍ର ଆରମ୍ଭରୁ ହିଁ ଭାରତୀୟ ଦଳ ଆକ୍ରମଣାତ୍ମକ ଆଭିମୁଖ୍ୟ ଆପଣାଇଥିଲା। ଖେଳର ୫ମ ମିନିଟ୍ରେ ଅଧିନାୟକ ହରମନପ୍ରୀତ ସିଂହ ପେନାଲ୍ଟି କୋର୍ନରକୁ ଗୋଲ୍ରେ ପରିଣତ କରି ଦଳକୁ ୧-୦ ରେ ଆଗୁଆ କରିଥିଲେ। ଏହାପରେ ୧୧ଶ ମିନିଟ୍ରେ ଅଭିଷେକ ଏକ ସୁନ୍ଦର ଫିଲ୍ଡ ଗୋଲ୍ ଦେଇ ବ୍ୟବଧାନକୁ ୨-୦ କରିଥିଲେ। ଦ୍ୱିତୀୟ କ୍ୱାର୍ଟରର ୨୧ତମ ମିନିଟ୍ରେ ହରମନପ୍ରୀତ ପୁଣି ଏକ ଗୋଲ୍ ସ୍କୋର କରି ଭାରତକୁ ୩-୦ ର ମଜବୁତ୍ ସ୍ଥିତିକୁ ନେଇଯାଇଥିଲେ।
ତେବେ ପାକିସ୍ତାନ ଦଳ ମଧ୍ୟ ସହଜରେ ହାର୍ ମାନିନଥିଲା। ୨୨ତମ ମିନିଟ୍ରେ ହନ୍ନାନ ଶାହିଦ୍ ପାକିସ୍ତାନ ପାଇଁ ପ୍ରଥମ ଗୋଲ୍ ସ୍କୋର କରିଥିଲେ। ଏହାର ଜବାବରେ ୨୪ତମ ମିନିଟ୍ରେ ଭାରତର ଅଭିଷେକ ନିଜର ଦ୍ୱିତୀୟ ଗୋଲ୍ ଦେଇ ସ୍କୋର ୪-୧ କରିଦେଇଥିଲେ। ଏହାର କିଛି ସମୟ ପରେ ପାକିସ୍ତାନର ସୁଫିୟାନ୍ ଖାନ୍ ପେନାଲ୍ଟି କୋର୍ନରରୁ ଗୋଲ୍ଟିଏ ସୋଧିବାରୁ ପ୍ରଥମାର୍ଦ୍ଧ ସୁଦ୍ଧା ସ୍କୋର ୪-୨ ରହିଥିଲା।
ତୃତୀୟ କ୍ୱାର୍ଟରର ୩୫ତମ ମିନିଟ୍ରେ ଭାରତକୁ ମିଳିଥିବା ପେନାଲ୍ଟି ଷ୍ଟ୍ରୋକ୍କୁ ହାର୍ଦ୍ଦିକ ସିଂହ ଗୋଲ୍ରେ ପରିଣତ କରି ଭାରତୀୟ ସ୍କୋରକୁ ୫-୨ ରେ ପହଞ୍ଚାଇଥିଲେ। ଚତୁର୍ଥ କ୍ୱାର୍ଟର (୪୬ତମ ମିନିଟ୍)ରେ ପାକିସ୍ତାନର ହନ୍ନାନ ଶାହିଦ୍ ପୁଣି ଏକ ଗୋଲ୍ ଦେଇ ବ୍ୟବଧାନକୁ ୫-୩ କୁ କମାଇଥିଲେ ହେଁ, ଭାରତୀୟ ରକ୍ଷଣପନ୍ଥୀ ଦଳ ଶେଷ ମୁହୂର୍ତ୍ତ ପର୍ଯ୍ୟନ୍ତ କୌଣସି ଭୁଲ୍ ନକରି ମ୍ୟାଚ୍କୁ ନିଜ କବ୍ଜାରେ ରଖିଥିଲେ।
ପୁଲ୍-ଡି ରୁ ଇଂଲଣ୍ଡ ଦଳ ଶୀର୍ଷରେ ରହି ପରବର୍ତ୍ତୀ ପର୍ଯ୍ୟାୟକୁ ଯାଇଥିବା ବେଳେ, ଭାରତ ୬ ପଏଣ୍ଟ ସହ ଦ୍ୱିତୀୟ ସ୍ଥାନରେ ରହି ସେମିଫାଇନାଲ୍ ରେସ୍ ଆଗକୁ ବଢ଼ାଇଛି।
