୧୨୦ କିମି ସ୍ପିଡ୍ରେ ଗାଡ଼ି ଚଲାଇଲେ ବି କଟିବନି ଚାଲାଣ! ନିତିନ୍ ଗଡ଼କରୀଙ୍କ ବଡ଼ ଘୋଷଣା
ହାଇୱେ ଓ ଏକ୍ସପ୍ରେସୱେରେ ଯାତାୟାତ କରୁଥିବା ଗାଡ଼ି ଚାଳକଙ୍କ ପାଇଁ ଏକ ବଡ଼ ଖବର ସାମ୍ନାକୁ ଆସିଛି। ରାସ୍ତାରେ ସ୍ପିଡ୍ ଲିମିଟ୍କୁ ନେଇ ବାରମ୍ବାର ଚାଲାଣ କଟୁଥିବା ବେଳେ ଏବେ ସେଥିରୁ କିଛିଟା ଆଶ୍ୱସ୍ତି ମିଳିବାକୁ ଯାଉଛି। କେନ୍ଦ୍ର ସଡ଼କ ଓ ପରିବହନ ମନ୍ତ୍ରୀ ନିତିନ୍ ଗଡ଼କରୀ ଫାଇନ୍ କାଟିବା ନିୟମକୁ ନେଇ ଏକ ବଡ଼ ନିର୍ଦ୍ଦେଶ ଦେଇଛନ୍ତି।
୧୨୦ କିମି ସ୍ପିଡ୍ ପର୍ଯ୍ୟନ୍ତ ନୋଟିସ ନ ଦେବାକୁ ନିର୍ଦ୍ଦେଶ
କନଫେଡେରେସନ୍ ଅଫ୍ ଇଣ୍ଡିଆନ୍ ଇଣ୍ଡଷ୍ଟ୍ରି (CII) ର ଏକ କାର୍ଯ୍ୟକ୍ରମରେ ଯୋଗଦେଇ ନିତିନ୍ ଗଡ଼କରୀ କହିଛନ୍ତି ଯେ, ଏକ୍ସପ୍ରେସୱେ କିମ୍ବା ନ୍ୟାସନାଲ ହାଇୱେରେ ୧୨୦ କିମି/ଘଣ୍ଟା ସ୍ପିଡ୍ ପର୍ଯ୍ୟନ୍ତ ଗାଡ଼ି ଚଲାଉଥିବା ଲୋକଙ୍କୁ ଚାଲାଣ ନୋଟିସ ନ ପଠାଇବାକୁ ସେ ବିଭାଗୀୟ ଅଧିକାରୀଙ୍କୁ ସ୍ପଷ୍ଟ ନିର୍ଦ୍ଦେଶ ଦେଇଛନ୍ତି।
୨୦% ଅତିରିକ୍ତ ସ୍ପିଡ୍ରେ ବି ମିଳିବ କୋହଳ
ମନ୍ତ୍ରୀ ଆହୁରି ମଧ୍ୟ ସ୍ପଷ୍ଟ କରିଛନ୍ତି ଯେ, ଯଦି କୌଣସି ଗାଡ଼ି ଚାଳକ ଧାର୍ଯ୍ୟ ସ୍ପିଡ୍ଠାରୁ ୨୦ ପ୍ରତିଶତ ଅଧିକ ବେଗରେ (ପ୍ରାୟ ୧୪୪ କିମି/ଘଣ୍ଟା ପର୍ଯ୍ୟନ୍ତ) ଗାଡ଼ି ନେଉଛନ୍ତି, ତେବେ ବି ସେମାନଙ୍କୁ ଛାଡ଼ିଦିଆଯିବା ଉଚିତ୍। ଏହି ସୀମା ବାହାରକୁ ଗଲେ ହିଁ କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ଏବଂ ଚାଲାଣ କଟାଯିବ।
AI ଟେକ୍ନୋଲୋଜି ଉପରେ ଜୋର୍
ସେ କହିଛନ୍ତି ଯେ କେବଳ ସ୍ପିଡ୍କୁ ନେଇ ଚାଳକଙ୍କୁ ହଇରାଣ କରିବା ପରିବର୍ତ୍ତେ ରାସ୍ତାରେ ଲେନ୍ ନିୟମ ଭାଙ୍ଗିବା ଓ ବିପଜ୍ଜନକ ଭାବେ ଗାଡ଼ି ଚଲାଇବା ଉପରେ କଡ଼ା ନଜର ରଖାଯିବା ଦରକାର। ସେଥିପାଇଁ ହାଇୱେରେ ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI) ଆଧାରିତ ‘ଅଡ୍ଭାନ୍ସଡ୍ ଟ୍ରାଫିକ୍ ମ୍ୟାନେଜମେଣ୍ଟ ସିଷ୍ଟମ୍’ (ATMS) ଲାଗୁ କରିବାକୁ ସେ ଗୁରୁତ୍ୱ ଦେଇଛନ୍ତି।
ଚାଳକଙ୍କ ପାଇଁ ସୂଚନା:ମନ୍ତ୍ରୀ ଏହି ନିର୍ଦ୍ଦେଶ ନିୟମରେ କୋହଳ ପାଇଁ ଦେଇଥିଲେ ବି, ପ୍ରତ୍ୟେକ ରାସ୍ତା ଓ ଗାଡ଼ିର ପ୍ରକାର ଅନୁସାରେ ଲଗାଯାଇଥିବା ଅଫିସିଆଲ୍ ସାଇନ୍ବୋର୍ଡ ସ୍ପିଡ୍ ଲିମିଟ୍କୁ ଧ୍ୟାନରେ ରଖି ଗାଡ଼ି ଚଲାଇବା ନିରାପଦ ଅଟେ।
