ଗାଲେରେ ମାନବ ସୁଥାରଙ୍କ କମାଲ: ୧୦ଟି ୱିକେଟ ନେଇ ଭାରତକୁ ଜିତାଇଲେ, ଭାଙ୍ଗିଲେ ହରଭଜନ-ଅଶ୍ୱିନଙ୍କ ରେକର୍ଡ
ଗାଲେ:ଶ୍ରୀଲଙ୍କା ମାଟିରେ ଭାରତୀୟ ଯୁବ ସ୍ପିନର ମାନବ ସୁଥାର ଏକ ଐତିହାସିକ ସଫଳତା ହାସଲ କରିଛନ୍ତି। ଗାଲେରେ ଖେଳାଯାଇଥିବା ପ୍ରଥମ ଟେଷ୍ଟ ମ୍ୟାଚରେ ସୁଥାରଙ୍କ ଘାତକ ବୋଲିଂ ବଳରେ ଭାରତ, ଶ୍ରୀଲଙ୍କାକୁ ୧୬୫ ରନର ବଡ଼ ବ୍ୟବଧାନରେ ପରାସ୍ତ କରିଛି। ଏହି ବିଜୟ ସହ ଭାରତ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜରେ ୧-୦ରେ ଆଗୁଆ ହେବା ସହ ବିଶ୍ୱ ଟେଷ୍ଟ ଚାମ୍ପିୟନସିପ୍ (WTC) ପଏଣ୍ଟ ଟେବୁଲରେ ଗୁରୁତ୍ୱପୂର୍ଣ୍ଣ ୧୨ ପଏଣ୍ଟ ହାସଲ କରିଛି।
ମ୍ୟାଚର ଦୁଇଟି ଯାକ ଇନିଂସ ମିଶାଇ ସୁଥାର ମୋଟ ୧୩୧ ରନ୍ ଦେଇ ୧୦ଟି ୱିକେଟ ନେଇଛନ୍ତି। ଶ୍ରୀଲଙ୍କା ମାଟିରେ କୌଣସି ଭାରତୀୟ ବୋଲରଙ୍କ ଦ୍ୱାରା ଏହା ସର୍ବଶ୍ରେଷ୍ଠ ବୋଲିଂ ପ୍ରଦର୍ଶନ। ଏହି ମାମଲାରେ ସେ ଭାରତର ଦୁଇ କିମ୍ବଦନ୍ତୀ ସ୍ପିନର ହରଭଜନ ସିଂ (୧୦/୧୫୩, ୨୦୦୮) ଏବଂ ରବିଚନ୍ଦ୍ରନ୍ ଅଶ୍ୱିନଙ୍କ (୧୦/୧୬୦, ୨୦୧୭) ରେକର୍ଡକୁ ପଛରେ ପକାଇ ଦେଇଛନ୍ତି। ଏହା ସହିତ ବିଦେଶ ମାଟିରେ ୧୦ଟି ୱିକେଟ ନେବାରେ ସେ ଭାରତର ସବୁଠାରୁ କମ୍ ବୟସ୍କ ସ୍ପିନର ହେବାର ଗୌରବ ଅର୍ଜନ କରିଛନ୍ତି।
ପ୍ରଥମ ଇନିଂସରେ ଭାରତ ଦେବଦତ୍ତ ପାଡିକଲଙ୍କ ଚିତ୍ତାକର୍ଷକ ୧୬୭ ରନ୍ ଏବଂ କେ.ଏଲ. ରାହୁଲଙ୍କ ୮୨ ରନ୍ ବଳରେ ୪୬୨ ରନର ବିଶାଳ ସ୍କୋର ଛିଡ଼ା କରିଥିଲା। ଜବାବରେ ଶ୍ରୀଲଙ୍କା ପ୍ରଥମ ଇନିଂସରେ ୨୮୪ ରନରେ ଅଲଆଉଟ୍ ହୋଇଯାଇଥିଲା।
ଦ୍ୱିତୀୟ ଇନିଂସରେ ଭାରତୀୟ ବ୍ୟାଟରମାନେ ବଡ଼ ସ୍କୋର କରିବାରେ ବିଫଳ ହୋଇ ୧୯୩ ରନରେ ସୀମିତ ରହିଥିଲେ। ଫଳରେ ଶ୍ରୀଲଙ୍କା ଆଗରେ ୩୭୨ ରନର କଠିନ ବିଜୟ ଲକ୍ଷ୍ୟ ରହିଥିଲା।
ତେବେ ପଞ୍ଚମ ଦିନରେ ଶ୍ରୀଲଙ୍କାର ବ୍ୟାଟିଂ ବିପର୍ଯ୍ୟୟ ଘଟାଇଥିଲେ ମାନବ ସୁଥାର। ସେ ମାତ୍ର ୫୫ ରନ୍ ଦେଇ ୬ଟି ୱିକେଟ ଅଖତିୟାର କରିଥିଲେ, ଯେଉଁଥିରେ ମାତ୍ର ୧୦ଟି ବଲ୍ ଭିତରେ ୪ଟି ୱିକେଟ ନେବା ସାମିଲ ଥିଲା। ଶ୍ରୀଲଙ୍କା ପକ୍ଷରୁ ସୋନାଲ ଦିନୁଷା ୮୪ ରନ୍ କରି କିଛି ସମୟ ଲଢ଼େଇ କରିଥିଲେ ବି ସୁଥାରଙ୍କ ବୋଲିଂ ଆଗରେ ଦଳ ଆତ୍ମସମର୍ପଣ କରିଥିଲା। ବର୍ଷା ଆସିବା ପୂର୍ବରୁ ଜିତି ଭାରତ ମ୍ୟାଚକୁ ସମ୍ପୂର୍ଣ୍ଣ ଆପଣାଯାତା କରିନେଇଥିଲା।
ଏହି ମ୍ୟାଚରେ ଅଭିଜ୍ଞ ଅଲରାଉଣ୍ଡର ରବିନ୍ଦ୍ର ଜାଡେଜା ମଧ୍ୟ ନିଜ ଟେଷ୍ଟ କ୍ୟାରିୟରର ୩୫୦ତମ ୱିକେଟ ପୂରଣ କରିଛନ୍ତି। କପିଲ ଦେବଙ୍କ ପରେ ଟେଷ୍ଟରେ ୪,୦୦୦ ରନ୍ ଏବଂ ୩୫୦ ୱିକେଟ ନେବାରେ ସେ ଦ୍ୱିତୀୟ ଭାରତୀୟ ହୋଇଛନ୍ତି।
ଜାଡେଜା ମାନବ ସୁଥାରଙ୍କ ବୋଲିଂର ଭୂୟସୀ ପ୍ରଶଂସା କରିଛନ୍ତି। ବିଶେଷ କରି ସୁଥାର ଶ୍ରୀଲଙ୍କା ବ୍ୟାଟର ଦିନେଶ ଚାନ୍ଦିମାଲଙ୍କୁ ଯେଉଁ ବଲରେ ଆଉଟ୍ କରିଥିଲେ, ତାହାକୁ ଜାଡେଜା “ଜଣେ ବାମହାତୀ ସ୍ପିନରଙ୍କ ସ୍ୱପ୍ନର ବଲ୍ (Dream Ball)” ବୋଲି ଅଭିହିତ କରିଛନ୍ତି।
ପ୍ରଥମ ମ୍ୟାଚ୍ ଜିତି ଭାରତ ୧-୦ରେ ଆଗୁଆ ରହିଥିବା ବେଳେ ପରବର୍ତ୍ତୀ ଟେଷ୍ଟ କୋଲମ୍ବୋରେ ଖେଳାଯିବ, ଯେଉଁଠାରେ ସିରିଜ୍ କ୍ଲିନ୍ ସ୍ୱିପ୍ କରିବାକୁ ଲକ୍ଷ୍ୟ ରଖିବ ଭାରତୀୟ ଦଳ।
