ଏସୀୟ କ୍ରୀଡ଼ା ୨୦୨୬: ପ୍ରଥମ ଦିନରେ ନିଶାଣସାଧି ଭାରତକୁ ଦୁଇଟି ରୌପ୍ୟ, କମାଲ କଲେ ଏଲାଭେନିଲ୍
ଆଇଚି-ନାଗୋୟା (ଜାପାନ): ୨୦ତମ ଏସୀୟ କ୍ରୀଡ଼ାରେ ଭାରତୀୟ ଶୁଟରଙ୍କ ଜବରଦସ୍ତ ଶୁଭାରମ୍ଭ। ପ୍ରତିଯୋଗିତାର ପ୍ରଥମ ଦିନରେ ହିଁ ମହିଳା ୧୦ ମିଟର ଏୟାର ରାଇଫଲ ବିଭାଗରେ ଭାରତ ଦୁଇ ଦୁଇଟି ରୌପ୍ୟ ପଦକ ହାସଲ କରି ଦେଶ ପାଇଁ ଗୌରବ ଆଣିଦେଇଛି।
ଭାରତୀୟ ଓଲିମ୍ପିଆନ୍ ଏଲାଭେନିଲ୍ ଭାଲାରିଭାନ୍ ବ୍ୟକ୍ତିଗତ ଫାଇନାଲରେ ଚମତ୍କାର ପ୍ରଦର୍ଶନ କରି ରୌପ୍ୟ ପଦକ ନିଜ ନାମରେ କରିଛନ୍ତି। ସେ ସୋନମ୍ ଉତ୍ତମ ମାସ୍କର ଏବଂ ବିଦାର୍ସା କୋଚାଲୁମକାଲ ବିନୋଦଙ୍କ ସହ ମିଶି ଦଳଗତ (ଟିମ୍) ବିଭାଗରେ ମଧ୍ୟ ରୌପ୍ୟ ପଦକ ଜିତିବାରେ ପ୍ରମୁଖ ଭୂମିକା ଗ୍ରହଣ କରିଛନ୍ତି।
ମହିଳା ୧୦ ମିଟର ଏୟାର ରାଇଫଲର ବ୍ୟକ୍ତିଗତ ଫାଇନାଲ ମୁକାବିଲା ବେଶ୍ ରୋମାଞ୍ଚକର ରହିଥିଲା। ଏଲାଭେନିଲ୍ ମୋଟ ୨୫୨.୪ ସ୍କୋର କରି ଦ୍ୱିତୀୟ ସ୍ଥାନରେ ରହିଥିଲେ। ଜାପାନର ହିନାତା ତାଏଚି ୨୫୩.୦ ସ୍କୋର କରି ନୂଆ ଏସୀୟ କ୍ରୀଡ଼ା ରେକର୍ଡ ସହ ସ୍ୱର୍ଣ୍ଣ ପଦକ କବଜା କରିଥିବା ବେଳେ ଦକ୍ଷିଣ କୋରିଆର ଓଲିମ୍ପିକ୍ ଚାମ୍ପିୟନ୍ ବାନ ହ୍ଯୋଜିନ (୨୩୦.୪ ସ୍କୋର) ବ୍ରୋଞ୍ଜ ପଦକ ପାଇଛନ୍ତି। ଅନ୍ୟତମ ଭାରତୀୟ ଶୁଟର ସୋନମ୍ ୧୬୭.୦ ସ୍କୋର କରି ଷଷ୍ଠ ସ୍ଥାନରେ ଅଭିଯାନ ଶେଷ କରିଥିଲେ।
ଟିମ୍ ବିଭାଗରେ ମଧ୍ୟ ରୌପ୍ୟ ସଫଳତା
ବ୍ୟକ୍ତିଗତ ଫାଇନାଲ ପୂର୍ବରୁ କ୍ୱାଲିଫିକେସନ୍ ସ୍କୋର ଆଧାରରେ ନିର୍ଦ୍ଧାରିତ ଟିମ୍ ଇଭେଣ୍ଟରେ ଭାରତୀୟ ତ୍ରିମୂର୍ତ୍ତି ସୋନମ୍, ଏଲାଭେନିଲ୍ ଓ ବିଦାର୍ସା ମୋଟ ୧୮୯୮.୦ ସ୍କୋର କରି ରୌପ୍ୟ ପଦକ ନିଜ ନାମରେ କରିଥିଲେ। ସୋନମ୍ ସର୍ବାଧିକ ୬୩୪.୧ ସ୍କୋର କରିଥିବା ବେଳେ ଏଲାଭେନିଲ୍ ୬୩୩.୫ ଏବଂ ବିଦାର୍ସା ୬୩୦.୪ ସ୍କୋର କରି ଦଳକୁ ପୋଡିୟମ୍ ସ୍ଥାନ ଦେଇଥିଲେ। ଏହି ବିଭାଗରେ ଚୀନ୍ (୧୯୦୪.୨ ସ୍କୋର) ସ୍ୱର୍ଣ୍ଣ ଏବଂ ଆୟୋଜକ ଜାପାନ (୧୮୯୭.୧ ସ୍କୋର) ବ୍ରୋଞ୍ଜ ପଦକ ପାଇଛନ୍ତି।
ସୋମବାର, ୨୧ ସେପ୍ଟେମ୍ବରରେ ପୁରୁଷ ୧୦ ମିଟର ଏୟାର ରାଇଫଲ (ବ୍ୟକ୍ତିଗତ ଓ ଟିମ୍) ଏବଂ ସ୍କିଟ୍ ବିଭାଗରେ ଭାରତୀୟ ଶୁଟରମାନେ ନିଜ ନିଶାଣ ସାଧିବେ।
