କୋଟିଆ ବିବାଦ: ସିଏମ୍ ମୋହନ ମାଝୀଙ୍କୁ ନବୀନ ପଟ୍ଟନାୟକଙ୍କ ଚିଠି; ବିଜେପିକୁ ୨୦୨୪ ସଂକଳ୍ପ ପତ୍ରର ପ୍ରତିଶ୍ରୁତି ମନେପକାଇଲେ
News Inshot: ଆନ୍ଧ୍ରପ୍ରଦେଶ ସହ ଦୀର୍ଘଦିନରୁ ଚାଲିଆସୁଥିବା କୋଟିଆ ସୀମା ବିବାଦକୁ ନେଇ ଓଡ଼ିଶା ରାଜନୀତି ଗରମ ହୋଇଛି। ବିରୋଧୀ ଦଳ ନେତା ବିଜେଡି ସୁପ୍ରିମୋ ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଚିଠି ଲେଖି କୋଟିଆ ମୁଦ୍ଦାକୁ କେନ୍ଦ୍ର ସରକାରଙ୍କ ନିକଟରେ ତୁରନ୍ତ ଉଠାଇବାକୁ ଦାବି କରିଛନ୍ତି। ଓଡ଼ିଶାର ଭୌଗୋଳିକ ଅଖଣ୍ଡତା ଏବଂ ସାମ୍ବିଧାନିକ ଅଧିକାରର ସୁରକ୍ଷା ପାଇଁ କେନ୍ଦ୍ର ସହ ଆଲୋଚନା କରିବା ଆବଶ୍ୟକ ବୋଲି ସେ ଦର୍ଶାଇଛନ୍ତି।
ନବୀନ ତାଙ୍କ ଚିଠିରେ ବିଜେପିର ୨୦୨୪ ବିଧାନସଭା ନିର୍ବାଚନ ସଂକଳ୍ପ ପତ୍ରକୁ ମନେପକାଇ ଦେଇଛନ୍ତି। କୋଟିଆ ବିବାଦର ସ୍ଥାୟୀ ସମାଧାନ ପାଇଁ ବିଜେପି ଦେଇଥିବା ପ୍ରତିଶ୍ରୁତିକୁ ରକ୍ଷା କରିବାକୁ ଏବଂ “କଥା ଅନୁସାରେ କାମ” କରିବାକୁ ସେ ଆହ୍ବାନ ଜଣାଇଛନ୍ତି। କୋଟିଆ ଅଞ୍ଚଳରେ ଆନ୍ଧ୍ରପ୍ରଦେଶ ପ୍ରଶାସନର ବେଆଇନ୍ ଅନୁପ୍ରବେଶ, ନିର୍ବାଚନୀ ପ୍ରସ୍ତୁତି ଏବଂ ବର୍ଦ୍ଧିତ ଉତ୍ତେଜନା ସମ୍ପର୍କରେ ସେ ଗଭୀର ଚିନ୍ତା ପ୍ରକଟ କରିଛନ୍ତି।
ଅନ୍ୟପଟେ, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହି ଆବେଗପୂର୍ଣ୍ଣ ସୀମା ବିବାଦକୁ ନେଇ ରାଜନୀତି ନକରିବାକୁ ନବୀନଙ୍କୁ ଅନୁରୋଧ କରିଛନ୍ତି। କୋଟିଆର ସର୍ବାଙ୍ଗୀନ ବିକାଶ ପାଇଁ ଏକ ମନ୍ତ୍ରୀସ୍ତରୀୟ କମିଟି ଗଠନ କରାଯାଇଛି ଏବଂ ସରକାର ଆଇନଗତ ଓ ପ୍ରଶାସନିକ ସ୍ତରରେ ଦୃଢ଼ ପଦକ୍ଷେପ ନେଉଥିବା ସେ ପ୍ରକାଶ କରିଛନ୍ତି। ବିରୋଧୀ ଦଳଙ୍କ ନିକଟରୁ କୌଣସି ଗଠନମୂଳକ ପରାମର୍ଶ ମିଳିଲେ ତାହାକୁ ସ୍ବାଗତ କରାଯିବ ବୋଲି ମଧ୍ୟ ମୁଖ୍ୟମନ୍ତ୍ରୀ କହିଛନ୍ତି।
