IRCTC ଦୁର୍ନୀତି ମାମଲା: ଲାଲୁ, ରାବଡ଼ି ଓ ତେଜସ୍କୀଙ୍କ ବିରୋଧରେ ଚାର୍ଜଫ୍ରେମ୍ ନିର୍ଦ୍ଦେଶ
ନୂଆଦିଲ୍ଲୀ: IRCTC ହୋଟେଲ ଦୁର୍ନୀତି ଓ ଅର୍ଥ ହେରଫେର୍ (Money Laundering) ମାମଲାରେ ଆରଜେଡି ସୁପ୍ରିମୋ ଲାଲୁ ପ୍ରସାଦ ଯାଦବ, ତାଙ୍କ ପତ୍ନୀ ରାବଡ଼ି ଦେବୀ ଓ ପୁଅ ତେଜସ୍କୀ ଯାଦବଙ୍କ ମୁସ୍କିଲ ବଢ଼ିବାରେ ଲାଗିଛି। ଏହି ମାମଲାରେ ଦିଲ୍ଲୀର ରାଉଜ୍ ଏଭେନ୍ୟୁ କୋର୍ଟ ଲାଲୁଙ୍କ ପରିବାର ସମେତ ମୋଟ ୯ ଜଣଙ୍କ ବିରୋଧରେ ଆନୁଷ୍ଠାନିକ ଭାବେ ଅଭିଯୋଗ (Charges) ଫ୍ରେମ୍ କରିବାକୁ ନିର୍ଦ୍ଦେଶ ଦେଇଛନ୍ତି। ଆସନ୍ତା ଅକ୍ଟୋବର ୩ ତାରିଖରେ କୋର୍ଟ ଆନୁଷ୍ଠାନିକ ଭାବେ ଏହି ଚାର୍ଜଫ୍ରେମ୍ କରିବେ।
ଶୁଣାଣି ସମୟରେ ବିଶେଷ ବିଚାରପତି ବିଶାଳ ଗୋଗନେ କହିଛନ୍ତି ଯେ, ଏହି ମାମଲାରେ ଅଭିଯୁକ୍ତମାନଙ୍କ ବିରୋଧରେ ପ୍ରଚୁର ପ୍ରମାଣ ରହିଛି। ସେହିପରି ତଦନ୍ତ ସଂସ୍ଥାର କାର୍ଯ୍ୟାନୁଷ୍ଠାନ କୌଣସି ରାଜନୈତିକ ପ୍ରତିଶୋଧପରାୟଣତାରୁ କରାଯାଇ ନାହିଁ ବୋଲି ସେ ସ୍ପଷ୍ଟ କରିଛନ୍ତି। ଅନ୍ୟପଟେ ପ୍ରମାଣ ଅଭାବରୁ କୋର୍ଟ ୭ ଜଣ ଅନ୍ୟ ସହ-ଅଭିଯୁକ୍ତଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି।
କ’ଣ ଥିଲା ପୁରା ଦୁର୍ନୀତି?
୨୦୦୪ରୁ ୨୦୦୯ ମସିହା ମଧ୍ୟରେ ଲାଲୁ ପ୍ରସାଦ ଯାଦବ କେନ୍ଦ୍ର ରେଳମନ୍ତ୍ରୀ ଥିବା ସମୟରେ, ଆଇଆରସିଟିସିର ପୁରୀ ଓ ରାଞ୍ଚିସ୍ଥିତ ଦୁଇଟି ହୋଟେଲକୁ ‘ସୁଜାତା ହୋଟେଲ୍ସ’ ନାମକ ଏକ ବେସରକାରୀ କମ୍ପାନୀକୁ ଲିଜ୍ରେ ଦିଆଯାଇଥିଲା। ଅଭିଯୋଗ ଅନୁଯାୟୀ, ଟେଣ୍ଡର ପ୍ରକ୍ରିୟାରେ ହେରଫେର୍ କରି ଏହି ଚୁକ୍ତି କରାଯାଇଥିଲା। ଏହାର ବଦଳରେ ଲାଲୁଙ୍କ ପରିବାରକୁ ପାଟନାରେ ଅତି କମ୍ ଦାମ୍ରେ ପ୍ରାୟ ୩୫୮ ଡେସିମିଲର ଦାମୀ ଜମି ମିଳିଥିଲା, ଯାହା ପରବର୍ତ୍ତୀ ସମୟରେ ରାବଡ଼ି ଦେବୀ ଓ ତେଜସ୍କୀ ଯାଦବଙ୍କ ନାମରେ ଟ୍ରାନ୍ସଫର ହୋଇଥିଲା।
ଏହି ମାମଲାରେ ସିବିଆଇ (CBI) ଓ ଏନଫୋର୍ସମେଣ୍ଟ ଡାଇରେକ୍ଟୋରେଟ (ED) ପୃଥକ ଭାବେ ତଦନ୍ତ କରି ଚାର୍ଜସିଟ୍ ଦାଖଲ କରିଥିଲେ। ବର୍ତ୍ତମାନ କୋର୍ଟଙ୍କ ଏହି ଆଦେଶ ପରେ ଲାଲୁ ପରିବାର ବିରୋଧରେ ଆଇନଗତ ବିଚାର ପ୍ରକ୍ରିୟା ଆହୁରି ଜୋରଦାର ହେବାକୁ ଯାଉଛି।
