ସିନ୍ଧୁ ନଦୀ ଜଳ ଚୁକ୍ତି: ନେଦରଲ୍ୟାଣ୍ଡସ କୋର୍ଟଙ୍କ ରାୟକୁ ଅଗ୍ରାହ୍ୟ କଲା ଭାରତ; କହିଲା – ‘କୌଣସି ଅଧିକାର ନାହିଁ’
ନୂଆଦିଲ୍ଲୀ: ସିନ୍ଧୁ ନଦୀ ଜଳ ଚୁକ୍ତି (IWT) ନେଇ ନେଦରଲ୍ୟାଣ୍ଡସର ‘କୋର୍ଟ ଅଫ୍ ଆର୍ବିଟ୍ରେସନ’ (PCA) ଦେଇଥିବା ନିର୍ଦ୍ଦେଶ ଓ ରାୟକୁ ସମ୍ପୂର୍ଣ୍ଣ ପ୍ରତ୍ୟାଖ୍ୟାନ କରିଛି ଭାରତ। ଭାରତର ବୈଦେଶିକ ମନ୍ତ୍ରଣାଳୟ (MEA) ସ୍ପଷ୍ଟ ଭାବରେ କହିଛି ଯେ ଏହି ତଥାକଥିତ କୋର୍ଟ ବେଆଇନ ଭାବେ ଗଠିତ ଏବଂ ଭାରତର ସାର୍ବଭୌମ ନିଷ୍ପତ୍ତି ଉପରେ କୌଣସି ପ୍ରକାରର ନିର୍ଦ୍ଦେଶ ଦେବାର ଏହାର କୌଣସି ଆଇନଗତ ଅଧିକାର ନାହିଁ।
ନିକଟରେ ଦି ହେଗ୍ସ୍ଥିତ ଏହି କୋର୍ଟ ରାୟ ଦେଇଥିଲେ ଯେ, ୧୯୬୦ ସିନ୍ଧୁ ନଦୀ ଜଳ ଚୁକ୍ତିକୁ ଭାରତ ସ୍ଥଗିତ (abeyance) ରଖିବା ସଠିକ୍ ନୁହେଁ ଏବଂ ଜାମ୍ମୁ-କାଶ୍ମୀରର ଚେନାବ ନଦୀରେ ନିର୍ମାଣ ହେଉଥିବା ରାଟଲେ ଜଳବିଦ୍ୟୁତ୍ ପ୍ରକଳ୍ପର କିଛି କାମ ବନ୍ଦ ରଖିବାକୁ ମଧ୍ୟ କହିଥିଲେ।
ତେବେ ଭାରତୀୟ ବୈଦେଶିକ ମନ୍ତ୍ରଣାଳୟ ନିଜ ବକ୍ତବ୍ୟରେ କହିଛି ଯେ, ବିଶ୍ୱବ୍ୟାଙ୍କ ଆଇନ ଏବଂ ଚୁକ୍ତିର ନିୟମକୁ ଅମାନ୍ୟ କରି ଏହି କୋର୍ଟ ଗଠନ କରିଥିଲା, ଯାହାକୁ ଭାରତ ପ୍ରାରମ୍ଭରୁ ଗ୍ରହଣ କରିନାହିଁ। ପାକିସ୍ତାନ ସ୍ପୋନ୍ସର କରୁଥିବା ଆତଙ୍କବାଦ ଯୋଗୁଁ ଭାରତ ନିଜର ସାର୍ବଭୌମିକ ଅଧିକାର ବ୍ୟବହାର କରି ଏହି ଚୁକ୍ତିକୁ ରଦ୍ଦ/ସ୍ଥଗିତ ରଖିଛି।
ଭାରତ ସ୍ପଷ୍ଟ କରିଛି ଯେ ଏହି ଅବୈଧ କୋର୍ଟର କୌଣସି ରାୟ କିମ୍ବା ନିର୍ଦ୍ଦେଶ ଭାରତରେ ଚାଲିଥିବା କୌଣସି ଜଳସେଚନ କିମ୍ବା ଜଳବିଦ୍ୟୁତ୍ ପ୍ରକଳ୍ପ ଉପରେ କୌଣସି ପ୍ରଭାବ ପକାଇବ ନାହିଁ।
