ଏସୀୟ କ୍ରୀଡ଼ା: ଦକ୍ଷିଣ କୋରିଆକୁ ୮-୨ ରେ ହରାଇଲା ଭାରତୀୟ ପୁରୁଷ ହକି ଟିମ୍, ସେମିଫାଇନାଲ ନିକଟତର
କାକାମିଗାହାରା (୨୪ ସେପ୍ଟେମ୍ବର): ଏସୀୟ କ୍ରୀଡ଼ା ୨୦୨୬ରେ ଭାରତୀୟ ପୁରୁଷ ହକି ଦଳର ବିଜୟ ଅଭିଯାନ ଜାରି ରହିଛି। ଗୁରୁବାର ପୁଲ୍-ଏ’ର ଏକ ଗୁରୁତ୍ୱପୂର୍ଣ୍ଣ ମ୍ୟାଚ୍ରେ ଭାରତୀୟ ଦଳ ଦକ୍ଷିଣ କୋରିଆକୁ ୮-୨ ଗୋଲ୍ରେ ପରାସ୍ତ କରି ଏସୀୟ କ୍ରୀଡ଼ା ଇତିହାସରେ କୋରିଆ ବିପକ୍ଷରେ ସବୁଠାରୁ ବଡ଼ ବିଜୟ ହାସଲ କରିଛି। ଏହି ସଫଳତା ସହ ଡିଫେଣ୍ଡିଂ ଚାମ୍ପିୟନ୍ ଭାରତ କ୍ରମାଗତ ତୃତୀୟ ବିଜୟ ସହ ସେମିଫାଇନାଲ ନିକଟତର ହୋଇଛି।
ଭାରତ ପକ୍ଷରୁ ଦିଲ୍ପ୍ରୀତ ସିଂହ ଓ ଅଭିଷେକ ୨ଟି ଲେଖାଏଁ ଗୋଲ୍ ସ୍କୋର କରିଥିବା ବେଳେ ଅଧିନାୟକ ହରମନପ୍ରୀତ ସିଂହ, ସୁଖଜୀତ୍ ସିଂହ, ରାଜିନ୍ଦର ସିଂହ ଏବଂ ଓଡ଼ିଆ ତାରକା ଶିଳାନନ୍ଦ ଲାକ୍ରା ଗୋଟିଏ ଲେଖାଏଁ ଗୋଲ୍ ଦେଇଥିଲେ। ମ୍ୟାଚ୍ର ପ୍ରଥମ କ୍ୱାଟରରୁ ହିଁ ଭାରତୀୟ ଦଳ ଦାବିଦାରି ମଜବୁତ କରି ୪-୦ରେ ଆଗୁଆ ରହିଥିଲା। ହାଫ୍-ଟାଇମ୍ ସୁଦ୍ଧା ସ୍କୋର ୫-୦ ଏବଂ ତୃତୀୟ କ୍ୱାଟର ଶେଷ ସୁଦ୍ଧା ୭-୧ ରହିଥିଲା। ଶେଷ କ୍ୱାଟରରେ କୋରିଆ ଦ୍ୱିତୀୟ ଗୋଲ୍ ଦେଇଥିବା ବେଳେ ମ୍ୟାଚ୍ ଶେଷ ହେବାର ମାତ୍ର ୩୮ ସେକେଣ୍ଡ ପୂର୍ବରୁ ରାଜିନ୍ଦର ଅଷ୍ଟମ ଗୋଲ୍ ସ୍କୋର କରିଥିଲେ।
ଏହି ମ୍ୟାଚ୍ ବିବେକ ସାଗର ପ୍ରସାଦଙ୍କ ପାଇଁ ସ୍ମରଣୀୟ ରହିଥିଲା, ଯିଏ ନିଜର ୨୦୦ତମ ଅନ୍ତର୍ଜାତୀୟ ମ୍ୟାଚ୍ ଖେଳି ସମ୍ବର୍ଦ୍ଧିତ ହୋଇଥିଲେ। ଭାରତ ତାର ପରବର୍ତ୍ତୀ ମ୍ୟାଚ୍ ସେପ୍ଟେମ୍ବର ୨୬ରେ ଆୟୋଜକ ଜାପାନ ବିପକ୍ଷରେ ଖେଳିବ।
