ନୂଆଦିଲ୍ଲୀ: ଭାରତର ମୁଖ୍ୟ ନିର୍ବାଚନ ଆୟୁକ୍ତ (CEC) ଜ୍ଞାନେଶ କୁମାରଙ୍କ ନାଗରିକତା ଓ ଭୋଟର ତାଲିକାକୁ ନେଇ ସୃଷ୍ଟି ହୋଇଥିବା ରାଜନୈତିକ ବିବାଦ ଉପରେ ଏବେ ବଡ଼ ସ୍ପଷ୍ଟୀକରଣ ଆସିଛି। ସିଇସିଙ୍କ କାର୍ଯ୍ୟାଳୟ ପକ୍ଷରୁ ସ୍ପଷ୍ଟ କରାଯାଇଛି ଯେ, ତାଙ୍କ ଭୋଟର ରେକର୍ଡରେ କୌଣସି ପ୍ରକାରର ତ୍ରୁଟି, ଅସଙ୍ଗତି କିମ୍ବା ଅନିୟମିତତା ନାହିଁ।

ତୃଣମୂଳ କଂଗ୍ରେସ (TMC) ସାଂସଦ ସାକେତ ଗୋଖଲେ ସୋସିଆଲ ମିଡିଆ ଏକ୍ସ (X) ରେ ଏକ ପୋଷ୍ଟ କରି ସିଇସିଙ୍କୁ ନେଇ ସନ୍ଦେହ ପ୍ରକାଶ କରିଥିଲେ। ସେ ଲେଖିଥିଲେ ଯେ, ଦିଲ୍ଲୀର ଖସଡ଼ା SIR (ବିଶେଷ ସଂଶୋଧନ) ଭୋଟର ତାଲିକାରେ “ଜ୍ଞାନେଶ କୁମାର, ପିତା: ସୁବୋଧ କୁମାର” ନାମ ରହିଛି। ମାତ୍ର ତାଙ୍କ ଜନ୍ମସ୍ଥାନ ଉତ୍ତର ପ୍ରଦେଶ, କାର୍ଯ୍ୟରତ କେରଳ କ୍ୟାଡର ଏବଂ ନୂଆଦିଲ୍ଲୀ—ଏହି ତିନୋଟି ଯାକ ରାଜ୍ୟର ୨୦୦୨/୨୦୦୩ ପୁରୁଣା SIR ତାଲିକା ଖୋଜିବା ପରେ ବି ତାଙ୍କ ନାମ ମିଳୁନାହିଁ।

ଗୋଖଲେ ଅଭିଯୋଗ ଆଣିଥିଲେ ଯେ, ଯଦି ଜଣେ ଭୋଟରଙ୍କ ନାମ ପୁରୁଣା SIR ତାଲିକାରେ ନଥାଏ, ତେବେ ନିୟମ ଅନୁଯାୟୀ ତାଙ୍କୁ ‘ତର୍କସଙ୍ଗତ ଅସଙ୍ଗତି’ (Logical Discrepancy) ବୋଲି ଦର୍ଶାଇ ନୋଟିସ୍ ପଠାଯିବା କଥା। ଏହାସହ ସେ ପ୍ରଶ୍ନ କରିଥିଲେ, “ସିଇସି ଜ୍ଞାନେଶ କୁମାର ଭାରତର ନାଗରିକ କି?”

ଏହି ଆରୋପ ପ୍ରତ୍ୟାରୋପ ଭିତରେ ‘ଟାଇମ୍ସ ନାଓ ଡିଜିଟାଲ’କୁ ସିଇସିଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି ଯେ, ଜ୍ଞାନେଶ କୁମାରଙ୍କ ଭୋଟର ରେକର୍ଡ ସମ୍ପୂର୍ଣ୍ଣ ବୈଧ। ଉତ୍ତର ପ୍ରଦେଶରେ ରହୁଥିବା ତାଙ୍କ ବାପା (ସୁବୋଧ କୁମାର)ଙ୍କ ପୁରୁଣା SIR ଭୋଟର ଆକାଉଣ୍ଟ ସହଜ୍ଞାନେଶ କୁମାରଙ୍କ ଭୋଟର ଏଣ୍ଟ୍ରିକୁ ସଠିକ୍ ଭାବେ ‘ମ୍ୟାପ୍’ (Mapped) କରାଯାଇଛି। ତେଣୁ ଏଥିରେ କୌଣସି ଆଇନଗତ କିମ୍ବା ବୈଷୟିକ ଅସଙ୍ଗତି ନାହିଁ।

ସୂଚନାଯୋଗ୍ୟ, ଜ୍ଞାନେଶ କୁମାର ୧୯୮୮ ବ୍ୟାଚ୍‌ର ଜଣେ ବରିଷ୍ଠ କେରଳ କ୍ୟାଡର IAS ଅଫିସର। ଭାରତୀୟ ସମ୍ବିଧାନ ଅନୁଯାୟୀ, କେବଳ ଜଣେ ଭାରତୀୟ ନାଗରିକ ହିଁ IAS ଅଫିସର କିମ୍ବା ମୁଖ୍ୟ ନିର୍ବାଚନ ଆୟୁକ୍ତ ପଦବୀରେ ନିଯୁକ୍ତି ପାଇପାରିବେ।

ଦିଲ୍ଲୀ ଭୋଟର ତାଲିକା ସଂଶୋଧନ (SIR) ପ୍ରକ୍ରିୟା ସମୟରେ ପ୍ରାୟ ୩୩ ଲକ୍ଷ ଭୋଟରଙ୍କୁ ‘ତଥ୍ୟଗତ ଅସଙ୍ଗତି’ ଦର୍ଶାଇ ନୋଟିସ୍ ପଠାଯାଇଛି। ଏହି ତାଲିକାରେ ପୂର୍ବତନ ଉପପ୍ରଧାନମନ୍ତ୍ରୀ ଏଲ୍.କେ. ଅଡଭାନୀ, ବୈଦେଶିକ ମନ୍ତ୍ରୀ ଏସ. ଜୟଶଙ୍କର, ପୂର୍ବତନ ଉପରାଷ୍ଟ୍ରପତି ଜଗଦୀପ ଧନଖଡ଼ ଏବଂ ନିର୍ବାଚନ ଆୟୁକ୍ତ ଏସ.ଏସ. ସନ୍ଧୁଙ୍କ ଭଳି ଅନେକ ପ୍ରମୁଖ ନେତା ଓ ଅଧିକାରୀଙ୍କ ନାମ ମଧ୍ୟ ରହିଛି। ଏହାକୁ ନେଇ ଏବେ ଦେଶର ରାଜନୀତି ଗରମ ରହିଛି।