ପୁରୀରେ ସାଧ୍ୱୀ ଋତମ୍ଭରାଙ୍କ ଭଗବତ୍ କଥା: ଯୋଗଦେଇ ପ୍ରବଚନ ଶୁଣିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ
ପୁରୀ, ୭ ସେପ୍ଟେମ୍ବର:
ପବିତ୍ର ଧାମ ପୁରୀଠାରେ ଆୟୋଜିତ ସାଧ୍ୱୀ ଋତମ୍ଭରା ଜୀଙ୍କ ଭଗବତ୍ କଥା କାର୍ଯ୍ୟକ୍ରମରେ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଯୋଗଦେଇଛନ୍ତି। ସେଠାରେ ସେ ଶ୍ରୀଜଗନ୍ନାଥଙ୍କ ଆଶୀର୍ବାଦ ନେବା ସହ ସାଧ୍ୱୀ ଋତମ୍ଭରାଙ୍କ ଶ୍ରୀମଦ୍ ଭାଗବତ କଥା ଶ୍ରବଣ କରି ଆଧ୍ୟାତ୍ମିକ ଶାନ୍ତି ଅନୁଭବ କରିଥିବା ପ୍ରକାଶ କରିଛନ୍ତି।
ଏହି ଅବସରରେ ମୁଖ୍ୟମନ୍ତ୍ରୀ ସୋସିଆଲ ମିଡିଆରେ ଲେଖିଛନ୍ତି ଯେ, ଶ୍ରୀରାମ ମନ୍ଦିର ଆନ୍ଦୋଳନର ପ୍ରମୁଖ ଧ୍ୱଜାଧାରୀ ଭାବେ ସନାତନ ଚେତନାର ଜାଗରଣ ଓ ଜାତୀୟ ସ୍ୱାଭିମାନ ପ୍ରତିଷ୍ଠାରେ ସାଧ୍ୱୀ ଋତମ୍ଭରାଙ୍କ ଯୋଗଦାନ ଅତୁଳନୀୟ। ଆମର ସନାତନ ପରମ୍ପରା, ନୈତିକ ମୂଲ୍ୟବୋଧ ଓ ସାଧୁସନ୍ଥଙ୍କ ଆଶୀର୍ବାଦ ଏକ ବିକଶିତ ଓ ସମୃଦ୍ଧ ଓଡ଼ିଶା ଗଠନର ମୂଳ ଶକ୍ତି। ସାଧୁସନ୍ଥଙ୍କ ପ୍ରବଚନ ରାଜ୍ୟର ବିକାଶ ଓ କଲ୍ୟାଣକାରୀ ଯାତ୍ରାକୁ ଆହୁରି ଆଗକୁ ନେବ ବୋଲି ସେ କହିଛନ୍ତି।
