ରାଜଘାଟରେ ନିର୍ମାଣ ହେବ ମନମୋହନ ସିଂହଙ୍କ ସ୍ମାରକୀ, DUAC ଦେଲା ମଞ୍ଜୁରୀ
ନୂଆଦିଲ୍ଲୀ:
ଦେଶର ପୂର୍ବତନ ପ୍ରଧାନମନ୍ତ୍ରୀ ସ୍ୱର୍ଗତ ଡଃ ମନମୋହନ ସିଂହଙ୍କ ସ୍ମାରକୀ ନିର୍ମାଣ ପାଇଁ ବାଟ ଫିଟିଛି। ଦିଲ୍ଲୀର ରାଜଘାଟ ନିକଟସ୍ଥ ‘ରାଷ୍ଟ୍ରୀୟ ସ୍ମୃତି ସ୍ଥଳ’ଠାରେ ଏହି ସ୍ମାରକୀ ନିର୍ମାଣ ପାଇଁ ଦିଲ୍ଲୀ ଅର୍ବାନ୍ ଆର୍ଟ କମିଶନ୍ (DUAC) ମଞ୍ଜୁରୀ ପ୍ରଦାନ କରିଛି। କେନ୍ଦ୍ରୀୟ ଲୋକ ନିର୍ମାଣ ବିଭାଗ (CPWD) ପକ୍ଷରୁ ଦାଖଲ କରାଯାଇଥିବା ନକ୍ସାକୁ କମିଶନ୍ ଅନୁମୋଦନ କରିବା ସହ କେତେକ ନିର୍ଦ୍ଦିଷ୍ଟ ସର୍ତ୍ତ ରଖିଛି।
କ’ଣ ରହିଛି କମିଶନଙ୍କ ସର୍ତ୍ତ?
-
ପୁରୁଣା ଶୈଳୀ ସହ ମେଳ: ନୂଆ ସ୍ମାରକୀର ଡିଜାଇନ୍, ରଙ୍ଗ ଏବଂ ନିର୍ମାଣ ସାମଗ୍ରୀ ଯେପରି ସେଠାରେ ପୂର୍ବରୁ ଥିବା ଅନ୍ୟ ସମାଧିଗୁଡ଼ିକ ସହ ମେଳ ଖାଉଥିବ। ଏଥିପାଇଁ ଧଳା ମାର୍ବଲ କିମ୍ବା ଧଳା ଗ୍ରାନାଇଟ୍ ବ୍ୟବହାର କରିବାକୁ କୁହାଯାଇଛି।
-
ପରିବେଶ ଓ ଗଛର ସୁରକ୍ଷା: ସ୍ମାରକୀ ପାଇଁ ନିର୍ଦ୍ଧାରିତ ସ୍ଥାନରେ ଥିବା ଏକ ପୁରୁଣା ଗଛକୁ ନକାଟି ସୁରକ୍ଷିତ ରଖିବାକୁ ଏବଂ ତାହାକୁ ସ୍ମାରକୀ ଡିଜାଇନ୍ ଭିତରେ ସାମିଲ କରିବାକୁ ନିର୍ଦ୍ଦେଶ ଦିଆଯାଇଛି।
-
ଶ୍ରଦ୍ଧାଳୁଙ୍କ ସୁବିଧା: ଶ୍ରଦ୍ଧାଳୁଙ୍କ ପାଇଁ ଜୋତା-ଚପଲ ରଖିବା ସ୍ଥାନ, ବର୍ଷାରୁ ରକ୍ଷା ପାଇବା ଭଳି ବସିବା ବେଞ୍ଚ, ଉପଯୁକ୍ତ ସାଇନ୍ବୋର୍ଡ ଓ ରାସ୍ତାର ବ୍ୟବସ୍ଥା ରହିବ।
ସୂଚନାଯୋଗ୍ୟ, ସ୍ମାରକୀର ବାହ୍ୟ ରୂପରେଖରେ କୌଣସି ବଡ଼ ପରିବର୍ତ୍ତନ କଲେ CPWD କୁ ପୁଣିଥରେ DUAC ର ଅନୁମତି ନେବାକୁ ପଡ଼ିବ।
