ପାକିସ୍ତାନରେ ସହେ ବର୍ଷର ପୁରୁଣା ହିନ୍ଦୁ ମନ୍ଦିର ଭଙ୍ଗାଯିବା ଘଟଣା: ଭାରତର କଡ଼ା ନିନ୍ଦା
ପାକିସ୍ତାନର ପଞ୍ଜାବ ପ୍ରଦେଶସ୍ଥିତ ନାରୋୱାଲ ଜିଲ୍ଲା ସିରାଜ ଗାଁରେ ଏକ ପ୍ରାୟ ୧୨୫ ବର୍ଷ ପୁରୁଣା ହିନ୍ଦୁ ମନ୍ଦିରକୁ ଭାଙ୍ଗି ଦିଆଯିବା ଘଟଣାକୁ ଭାରତ ଦୃଢ଼ ଭାବରେ ନିନ୍ଦା କରିଛି। ଭାରତୀୟ ବୈଦେଶିକ ମନ୍ତ୍ରଣାଳୟ (MEA) ଏହାକୁ ଏକ ଅତ୍ୟନ୍ତ ନିନ୍ଦନୀୟ କାର୍ଯ୍ୟ ବୋଲି କହିବା ସହ ପାକିସ୍ତାନରେ ସଂଖ୍ୟାଲଘୁ ସମ୍ପ୍ରଦାୟର ସୁରକ୍ଷା ଓ ଧାର୍ମିକ ସ୍ୱାଧୀନତା ନେଇ ଗଭୀର ଚିନ୍ତା ପ୍ରକଟ କରିଛି।
ବୈଦେଶିକ ମନ୍ତ୍ରଣାଳୟର ପ୍ରବକ୍ତା ରଣଧୀର ଜୈସୱାଲ କହିଛନ୍ତି ଯେ, ଏହି ଘଟଣା ପାକିସ୍ତାନ ପ୍ରଶାସନର ଉଦାସୀନତାକୁ ଦର୍ଶାଉଛି। ସେଠାରେ ସଂଖ୍ୟାଲଘୁ ସମ୍ପ୍ରଦାୟ ଏବଂ ସେମାନଙ୍କର ଉପାସନା ପୀଠଗୁଡ଼ିକ କେତେ ଅସୁରକ୍ଷିତ, ଏହି ଘଟଣା ତାହାର ଏକ ବଡ଼ ପ୍ରମାଣ। ଏହି ମାମଲାରେ ପାକିସ୍ତାନ ସରକାର ତୁରନ୍ତ ଓ ସ୍ୱଚ୍ଛ ତଦନ୍ତ କରି ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ ଏବଂ ଭଙ୍ଗାଯାଇଥିବା ମନ୍ଦିରର ପୁନଃନିର୍ମାଣ କରନ୍ତୁ ବୋଲି ଭାରତ ଦାବି କରିଛି।
ସ୍ଥାନୀୟ ସଂଖ୍ୟାଲଘୁ ସଂଗଠନଗୁଡ଼ିକର ଅଭିଯୋଗ ଅନୁଯାୟୀ, ଗତ ଅଗଷ୍ଟ ୨୧ ତାରିଖରେ ମନ୍ଦିର ପାଖରେ ଥିବା ଏକ ମଦ୍ରାସାର ସମ୍ପ୍ରସାରଣ ପାଇଁ କିଛି କଟ୍ଟରପନ୍ଥୀ ମନ୍ଦିରଟିକୁ ଭାଙ୍ଗି ଦେଇଥିଲେ। ଅପରପକ୍ଷରେ, ପାକିସ୍ତାନର ଇଭାକ୍ୟୁଇ ଟ୍ରଷ୍ଟ ପ୍ରପର୍ଟି ବୋର୍ଡ (ETPB) ଦାବି କରିଛି ଯେ ପ୍ରବଳ ବର୍ଷା ଯୋଗୁଁ ମନ୍ଦିରଟି ଭୁଶୁଡ଼ି ପଡ଼ିଛି। ଏହି ଘଟଣାକୁ ନେଇ ପାକିସ୍ତାନର ସ୍ଥାନୀୟ ହିନ୍ଦୁ ସମ୍ପ୍ରଦାୟ ମଧ୍ୟରେ ମଧ୍ୟ ଗଭୀର ଅସନ୍ତୋଷ ଓ ଭୟର ବାତାବରଣ ସୃଷ୍ଟି ହୋଇଛି।
