ଇରାନକୁ ନେଇ ଟ୍ରମ୍ପ-ନେତାନ୍ୟାହୁଙ୍କ ଭିନ୍ନ ମତ: କ୍ରମାଗତ ଆକ୍ରମଣ ଚାହୁଁଛନ୍ତି ଇସ୍ରାଏଲ୍ ପ୍ରଧାନମନ୍ତ୍ରୀ, ଟ୍ରମ୍ପ କହିଲେ— ‘ଆମ ପାଖରେ ସମୟ ଅଛି’
ୱାଶିଂଟନ୍ /News Inshot:
ଇରାନ ବିରୋଧରେ ସାମରିକ କାର୍ଯ୍ୟାନୁଷ୍ଠାନକୁ ନେଇ ଆମେରିକା ଓ ଇସ୍ରାଏଲ୍ ନେତୃତ୍ୱ ମଧ୍ୟରେ କିଛିଟା ମତାନ୍ତର ସାମ୍ନାକୁ ଆସିଛି। ଗୋଟିଏ ପଟେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କୂଟନୈତିକ ଆଲୋଚନାକୁ ଆଉ କିଛି ସମୟ ଦେବାକୁ ଚାହୁଁଥିବା ବେଳେ, ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ତୁରନ୍ତ ଇରାନର ପରମାଣୁ ଓ ସାମରିକ ଘାଟି ଉପରେ କଠୋର ଆକ୍ରମଣ ପାଇଁ ଜିଦ୍ ଧରିଛନ୍ତି।
ସୂତ୍ରରୁ ମିଳିଥିବା ସୂଚନା ଅନୁଯାୟୀ, ନିକଟରେ ଉଭୟ ନେତାଙ୍କ ମଧ୍ୟରେ ଫୋନ୍ରେ କଥାବାର୍ତ୍ତା ହୋଇଥିଲା। ଟ୍ରମ୍ପ ସାର୍ବଜନୀନ ଭାବେ ଏହାକୁ “ଖୁବ୍ ଭଲ ଆଲୋଚନା” ବୋଲି କହିଥିଲେ ବି, ଭିତରର ସ୍ଥିତି ବେଶ୍ ଗମ୍ଭୀର ଥିଲା। ଇରାନ ଉପରେ ଚାପ ହ୍ରାସ ପାଇବା ଭୟରେ ନେତାନ୍ୟାହୁ ଆମେରିକା ମିଡ୍ଟର୍ମ ନିର୍ବାଚନ ପରେ ତୁରନ୍ତ ଆକ୍ରମଣ କରିବାକୁ ପ୍ରସ୍ତାବ ଦେଇଥିବା କୁହାଯାଉଛି।
ଅନ୍ୟପଟେ ଟ୍ରମ୍ପ ସାମ୍ବାଦିକମାନଙ୍କୁ କହିଛନ୍ତି, “ଇରାନ ଆଲୋଚନା କରିବାକୁ ଚାହୁଁଛି ଏବଂ ଆମ ସହ କଥାବାର୍ତ୍ତା ଚାଲିଛି। ଆମ ପାଖରେ ଯଥେଷ୍ଟ ସମୟ ଅଛି।” କାତାର ମାଧ୍ୟମରେ ଆମେରିକା ଏବଂ ଇରାନ ମଧ୍ୟରେ ଏହି ପରୋକ୍ଷ ଆଲୋଚନା ଚାଲିଛି।
ତେବେ ଟ୍ରମ୍ପ ସ୍ପଷ୍ଟ କରିଛନ୍ତି ଯେ, କୂଟନୈତିକ ବାଟ ଖୋଲା ଥିଲେ ବି ଆମେରିକା ନିଜ ସାମରିକ ପ୍ରସ୍ତୁତିରୁ ଓହରିନାହିଁ। ଆବଶ୍ୟକ ପଡ଼ିଲେ ମାତ୍ର ୧୦ ମିନିଟ୍ ମଧ୍ୟରେ ଇରାନର ଗୁରୁତ୍ୱପୂର୍ଣ୍ଣ ସାମରିକ ଘାଟିକୁ ଧ୍ୱଂସ କରିବାର କ୍ଷମତା ଆମେରିକା ପାଖରେ ଅଛି ବୋଲି ସେ ଚେତାବନୀ ଦେଇଛନ୍ତି।
ଷ୍ଟ୍ରେଟ୍ ଅଫ୍ ହୋରମୁଜ୍ (Strait of Hormuz) ଅଞ୍ଚଳରେ ତେଲ ଟ୍ୟାଙ୍କର ଉପରେ ମାଡ଼ ହେବା ଏବଂ ସମୁଦ୍ର ମଧ୍ୟରେ ଉତ୍ତେଜନା ବୃଦ୍ଧି ପାଇବା ପରେ ସମଗ୍ର ମଧ୍ୟପ୍ରାଚ୍ୟରେ ସ୍ଥିତି ପୁଣି ଥରେ ଅତି ସଂବେଦନଶୀଳ ହୋଇପଡ଼ିଛି।
