ସୋସିଆଲ ମିଡିଆରେ ମେଟା AIର ମୁଖ୍ୟ ଆଲେକ୍ସଜାଣ୍ଡାର୍ ୱାଙ୍ଗଙ୍କ ଏକ ପୋଷ୍ଟକୁ ନେଇ ବେଶ ଚର୍ଚ୍ଚା ଚାଲିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଓପନ୍‌ AI ସିଇଓ ସାମ୍ ଅଲ୍ଟମ୍ୟାନ୍‌ ଏବଂ ଆନ୍ଥ୍ରୋପିକ୍ ସିଇଓ ଡାରିଓ ଆମୋଡେଇଙ୍କ ଏକ ଏଡିଟେଡ୍ ଫଟୋ ‘X’ (ଟ୍ୱିଟର)ରେ ପୋଷ୍ଟ କରିବା ପରେ ସେ ତାହାକୁ ହଟାଇ ଦେଇଛନ୍ତି।

ଇଣ୍ଡିଆ AI ସମ୍ମିଳନୀ ସମୟରେ ମଞ୍ଚ ଉପରେ ପ୍ରଧାନମନ୍ତ୍ରୀ ମୋଦୀ, ସାମ୍ ଅଲ୍ଟମ୍ୟାନ୍‌ ଓ ଡାରିଓ ଆମୋଡେଇ ଏକାଠି ଛିଡ଼ା ହୋଇ ଫଟୋ ଉଠାଇଥିଲେ। ବିଜନେସ୍ କ୍ଷେତ୍ରରେ ପରସ୍ପରର ବଡ଼ ପ୍ରତିଦ୍ୱନ୍ଦ୍ୱୀ ହୋଇଥିବାରୁ ଅଲ୍ଟମ୍ୟାନ୍‌ ଓ ଆମୋଡେଇ ସେତେବେଳେ ହାତ ମିଶାଇ ନଥିଲେ, ଯାହା ଭାଇରାଲ ହୋଇଥିଲା।

ଏହି ସୁଯୋଗରେ ମେଟା AI ମୁଖ୍ୟ ଆଲେକ୍ସଜାଣ୍ଡାର୍ ୱାଙ୍ଗ ନିଜର ନୂଆ ‘ମ୍ୟୁଜ୍ (Muse)’ AI ଟୁଲ୍‌କୁ ପ୍ରମୋଟ୍ କରିବା ପାଇଁ ସେହି ଫଟୋରେ AI ମାଧ୍ୟମରେ ‘ମ୍ୟୁଜ୍‌’ର ମସ୍କୋଟ୍ (ଫୁର୍କି କାର୍ଟୁନ୍ ଚରିତ୍ର)କୁ ଦୁହିଁଙ୍କ ମଝିରେ ବସାଇ ଦେଇଥିଲେ। ଫଟୋରେ ଦେଖାଯାଉଥିଲା ଯେ ଯେପରି AI ମସ୍କୋଟ୍‌ଟି ଦୁଇ ଜଣ ପ୍ରତିଦ୍ୱନ୍ଦ୍ୱୀଙ୍କ ହାତ ଧରାଇ ଦେଇଛି। ୱାଙ୍ଗ ରସିକତା କରି କ୍ୟାପସନରେ ଲେଖିଥିଲେ— “ମ୍ୟୁଜ୍ କ’ଣ କରିପାରିବ ନାହିଁ?” ଏବଂ “ମ୍ୟୁଜ୍‌କୁ ନୋବେଲ ଶାନ୍ତି ପୁରସ୍କାର କେଉଁଠି ମିଳିବ?”

ପୋଷ୍ଟ କରିବାର କିଛି ଘଣ୍ଟା ମଧ୍ୟରେ ୱାଙ୍ଗ ଏହାକୁ ‘X’ରୁ ହଟାଇ ଦେଇଥିଲେ। ଏହି ବିଷୟରେ ମେଟା କିମ୍ବା ୱାଙ୍ଗଙ୍କ ପକ୍ଷରୁ କୌଣସି ସ୍ପଷ୍ଟୀକରଣ ଦିଆଯାଇ ନାହିଁ। ତେବେ କୌଣସି ଦେଶର ପ୍ରଧାନମନ୍ତ୍ରୀଙ୍କ ବିକୃତ କରାଯାଇଥିବା (Edited) ଫଟୋକୁ ନେଇ ଅନାବଶ୍ୟକ ବିବାଦରୁ ବଞ୍ଚିବା ପାଇଁ ସେ ଏପରି କରିଥାଇପାରନ୍ତି ବୋଲି ଅନୁମାନ କରାଯାଉଛି।